33 ادامدى جۇمىسپەن قامتىپ وتىرمىن - تۇيە جۇنىنەن بۇيىم جاسايتىن ماڭعىستاۋلىق كاسىپكەر
استانا. KAZINFORM - ەلوردادا وتكەن «ادال ازامات. ادال ەڭبەك. ادال بيزنەس» فورۋمىندا قوي مەن تۇيە جۇنىنەن جاسالعان ءونىم ارقىلى 2023 -جىلى ماڭعىستاۋ وبلىسىندا «ءبىر اۋىل - ءبىر ءونىم» جوباسىنىڭ جەڭىمپازى بولعان الەۋمەتتىك كاسىپكەر جاڭاگۇل جاپاروۆا ءوزىنىڭ بۇل سالاعا قالاي كەلگەنىن ايتىپ بەردى.
«سوڭعى كەزدە اۋىلدا كەرەكسىز بولىپ، دالادا شاشىلىپ، ورتەنىپ جاتقان قوي مەن تۇيە ءجۇنى مەنى قاتتى الاڭداتتى. نەگە وسىنى كادەگە جاراتپاسقا دەگەن ويمەن، جۇننەن جاسالاتىن ءونىم شىعارۋ يدەياسىن قولعا الدىم. سول كەزدە «ءبىر اۋىل - ءبىر ءونىم» جوباسى تۋرالى ءبىلدىم. قۇرىق اۋىلىنداعى جۇمىسسىز جۇرگەن ايەلدەردىڭ باسىن قوسىپ، تۇيە مەن قوي جۇنىنەن ءتۇرلى ونىمدەر شىعارا باستادىم. وسىلايشا، 2022 -جىلى قۇرىق اۋىلىندا «ءبىر اۋىل - ءبىر ءونىم» پيلوتتىق جوباسى ىسكە قوسىلدى»، - دەدى جاپاروۆا جاڭاگۇل.
كاسىپكەردىڭ ايتۋىنشا، العاشىندا «اتامەكەن» پالاتاسىنىڭ ىسكەر ايەلدەر كەڭەسى مەن جەرگىلىكتى اكىمدىك تاراپىنان قولداۋ كورسەتىلىپ، ءىستى جۇرگىزۋگە عيماراتتان تەگىن ورىن بەرىلگەن. سوڭعى ەكى جىلدا جالپى قۇنى 15 ميلليون تەڭگەدەن اساتىن ءتۇرلى گرانتقا، دەمەۋشىلەر قولداۋىنا يە بولعان. سونىڭ ارقاسىندا ءجۇن وڭدەۋگە قاجەتتى ءتۇرلى زاتتار مەن قۇرال-جابدىقتار ساتىپ الىپ، بيزنەسىن دامىتقان.
«قازىرگى تاڭدا 33 ادامدى جۇمىسپەن قامتىپ وتىرعان جايىم بار. ونىڭ ىشىندە 3 ادام مەملەكەتتىك سۋبسيديالاۋمەن، الەۋمەتتىك جۇمىس ورىندارى بويىنشا - 2 مۇمكىندىگى شەكتەۋلى ادام، كوپ بالالى - 8 ايەل جۇمىس ىستەيدى. ءونىم مەن قاپتاما ديزاينى جاسالدى، 30 دان استام ءتۇرلى ترەنينگتەر مەن وقۋلارعا قاتىستىق، ءوندىرىس تەحنولوگيالارىن مەڭگەردىك. سونىمەن قاتار، كوپتەگەن وبلىستىق، رەسپۋبليكالىق جانە ا ق ش، گەرمانيا، تۇركيا، ازەربايجان، موڭعوليا مەملەكەتتەرىندە وتكەن حالىقارالىق كورمە- جارمەڭكەلەرگە قاتىستىق»، - دەيدى الەۋمەتتىك كاسىپكەر.
سونداي-اق، ول قۇرىق اۋىلىنان شىققان ونىمدەر ەكسپورتقا كەتكەنىن ەرەكشە ماقتانىشپەن ايتتى.
«2023 -جىلدىڭ ماۋسىمىندا ءبىز قىرعىزستانداعى ارىپتەستەرىمىزدىڭ ۇسىنىسى بويىنشا كادەسىي تۇرىندە 100 تۇيە جاسادىق. وسىلايشا قىرعىز- قازاق كاسىپكەرلەرى بىرىگىپ، «ءبىر اۋىل - ءبىر ءونىم» جوباسى اياسىندا حالىقارالىق دۇكەندەر جەلىسىنە تاۋار ەكسپورتتادىق» ، - دەدى جاڭاگۇل جاپاروۆا.
فورۋم بارىسىندا پرەمەر-مينيستر ەلگە جاناشىرلىق تانىتقان كاسىپكەرلەرگە العىس ايتتى.
سونداي-اق، ەلىمىزدە وتاندىق تاۋارلاردىڭ جانە تاۋار وندىرۋشىلەردىڭ ءبىرىڭعاي اشىق رەەسترى ازىرلەنىپ جاتقانىن مالىمدەدى.
ودان بولەك، ازىرلەنىپ جاتقان «ەنەرگەتيكالىق جانە كوممۋنالدىق سەكتوردى جاڭعىرتۋ» ۇلتتىق جوباسى اياسىندا تۇكش سالاسىنا 10 تريلليون تەڭگە ينۆەستيتسيا تارتىلاتىنىن اتاپ ءوتتى.
