سوڭعى بەس جىلدا ەلىمىزدە جاسوسپىرىمدەر اراسىندا جۇكتىلىكتىڭ 33 مىڭ 51 فاكتىسى تىركەلگەن
بۇگىن پارلامەنت ءماجىلىسىنىڭ جالپى وتىرىسىندا دەپۋتات باقتيار ماكەن وسى ماسەلەنى كوتەردى.
دەپۋتاتتىڭ ايتۋىنشا، سوڭعى جىلدارى جاڭا تۋعان سابيلەردىڭ دارەتحانالار مەن قوقىس ۇيىندىلەرىنە لاقتىرىلىپ تاستالۋىنا قاتىستى وقيعالاردىڭ جيىلەۋى قوعامدا ۇلكەن رەزونانس تۋدىرىپ وتىر. ادامشىلىقتان ادا مۇنداي وقيعا تاراز، اقتوبە جانە جەزقازعان قالالارىندا قايتالانعان. بۇل رەتتە باقتيار ماكەن ت م د مەملەكەتتەرىنىڭ اۋماعىندا جاسوسپىرىمدەر جۇكتىلىگى ىندەت رەتىندە قارالاتىن دەڭگەيگە جەتكەنىن اتاپ وتەدى.
«قازاقستانداعى جاسوسپىرىمدەر اراسىنداعى جۇكتىلىكتىڭ پايىزى رەسەيمەن، ۋكراينامەن سالىستىرعاندا ءبىرشاما ازداۋ، الايدا وسى ماسەلە قاتتى الاڭداتىپ، قالىڭ ويعا قالدىرادى. ستاتيستيكا مالىمەتتەرى بويىنشا ەلىمىزدە ايەلدەردىڭ بەستەن ءبىرىن 18 جاسقا دەيىنگى ءجاسوسپىرىم قىزدار قۇرايدى، ولاردىڭ سانى 2 ميلليوننان استام. ال دەنساۋلىق ساقتاۋ جانە الەۋمەتتىك دامۋ مينيسترلىگىنىڭ مالىمەتى بويىنشا سوڭعى بەس جىلدا جاسوسپىرىمدەر اراسىندا جۇكتىلىكتىڭ 33 مىڭ 51 فاكتىسى، وعان قوسا 15 جانە 18 جاستاعى قىزداردىڭ 9906 جاساندى تۇسىگى تىركەلگەن. بۇل مالىمەت پايىزدىق كورسەتكىش بويىنشا باتىس ەۋروپا ەلدەرىنەن ەكى- ءۇش ەسەگە ارتىق. ال 15 جانە 18 جاس ارالىعىنداعى قىزداردىڭ جاساندى تۇسىك كورسەتكىشتەرى ءالى كۇنگە جوعارى، جىل سايىن ەكى مىڭعا دەيىن جەتەدى»، - دەدى دەپۋتات ب. ماكەن.
وسى رەتتە دەپۋتات ەرتە جۇكتى بولۋ جاسوسپىرىم قىزداردىڭ دەنساۋلىعىنا زيانىن كەلتىرىپ، ونىڭ سوڭى قايعىلى جاعدايلارعا ۇلاسىپ جاتاتىنىن اتاپ ءوتتى. ونىڭ ايتۋىنشا، 15-18 جاس ارالىعىنداعى جۇكتى بولۋ وقيعالارى كوبىنەسە ولىمگە سوقتىرادى. ماسەلەن، دامىعان ەلدەردە جىل سايىن 70 مىڭعا تارتا جاسوسپىرىم كوز جۇمادى.
«جاسوسپىرىمدەر اراسىنداعى جىنىستىق قاتىناستار، ەرتە جۇكتى بولۋ مەن، كامەلەتكە تولماعانداردىڭ نەكەلەرى، ەرتە جاستاعى تۇسىك تاستاۋلار، انالاردىڭ تۋعان نارەستەسىنەن باس تارتۋى، انا مەن بالانىڭ ءولىم-ءجىتىم كورسەتكىشىنىڭ ارتۋى، قىزدار اراسىنداعى سۋيتسيدتەردىڭ كوبەيۋى وسىنىڭ بارلىعى ەلىمىزدىڭ دەموگرافيالىق احۋالىنى كەرى اسەرىن تيگىزەدى. بۇل ۇلتتىق دەڭگەيدەگى ماسەلە»، دەدى ب. ماكەن.
ونىڭ ايتۋىنشا، بۇرىن ەرتە جاستان جۇكتىلىك ماسەلەسى نەگىزىنەن جاعدايى تومەن وتباسىلاردا ورىن الادى دەگەن تۇسىنىك بولسا، قازىر جاعداي ولاي ەمەستىگىن كورسەتكەن. بۇگىنگى كۇنى الەۋمەتتىك تەڭسىزدىك تە بايقالادى.
«اتا-انالار تاراپىنان ءتيىستى نازار اۋدارىلماعان جاعدايدا جاسوسپىرىمدەر سانالىلىعى تومەندەيدى. سونىڭ ىشىندە جاسوسپىرىمدەر اراسىنداعى جۇكتىلىك جىنىستىق تاربيەنىڭ دۇرىس جۇرگىزىلمەۋىنەن دە بولىپ تابىلادى. مۇنداي جاعدايعا تاپ بولعان قىز بالالار الەۋمەتتىك قولداۋعا ءزارۋ»، - دەدى دەپۋتات.
اۆتور: قانات مامەتقازى ۇلى
