قازاقستانعا 32 جىلدا قانشا ەتنيكالىق قازاق ورالدى

استانا. قازاقپارات - بيىلعى جىل باسىنان 4,5 مىڭ استام ەتنيكالىق قازاق قانداس مارتەبەسىن الدى. قازاقپارات بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ حابارلايدى.

2023 -جىلعى 1-ساۋىردەگى جاعداي بويىنشا 4575 ەتنيكالىق قازاق تاريحي وتانىمەن تابىسىپ، قانداس مارتەبەسىن الدى. جالپى 1991 -جىلدان بەرى رەسپۋبليكاعا 1 ميلليون 111,1 مىڭ ەتنيكالىق قازاق ورالدى.

جىل باسىنان قازاقستانعا كەلگەن قانداستاردىڭ تەڭ جارتىسى (52,4 پايىز) - وزبەكستاننان، 19,3 پايىز - قىتايدان، 6,3 پايىز - تۇرىكمەنستاننان، 5,3 پايىز - موڭعوليادان، 13 پايىز - رەسەيدەن جانە 3,7 پايىز باسقا ەلدەردەن كەلدى.

ولار نەگىزىنەن الماتى (27,9 پايىز)، ماڭعىستاۋ (13,9 پايىز)، تۇركىستان (6,8 پايىز) جانە جامبىل (5 پايىز) وبلىستارىنا، سونداي-اق الماتى (9,0 پايىز)، استانا (11 پايىز) جانە شىمكەنت (6,5 پايىز) قالالارىنا قونىستاندى.

وسى جىلدىڭ 1-ساۋىرىندەگى جاعداي بويىنشا ەڭبەككە قابىلەتتى جاستاعى ەتنيكالىق قونىس اۋدارۋشىلار سانى - 69,1 پايىز، ەڭبەككە قابىلەتتى جاستان كىشىلەر - 22,3 پايىز جانە زەينەتكەرلەر 8,6 پايىز قۇرايدى.

ەڭبەككە قابىلەتتى جاستاعى قانداستاردىڭ ىشىندە ءبىلىم دەڭگەيى بويىنشا 18,5 پايىز - جوعارى ءبىلىمدى، 39,9 پايىز - ورتا كاسىبي ءبىلىمدى، 36,7 پايىز - جالپى ورتا ءبىلىمدى جانە 4,8 پايىز ءبىلىمى جوق.