17:53, 13 - اقپان 2023 | GMT +6
تۇركيادا جەر سىلكىنىسىنەن قازا تاپقاندار سانى 31 مىڭنان استى
انكارا. انادولى - قازاقپارات - تۇركيا ۇكىمەتى جانىنداعى تابيعي اپاتتار جانە توتەنشە جاعدايلارمەن كۇرەس باسقارماسىنىڭ (AFAD) جاڭارتىلعان مالىمەتى بويىنشا، تۇركيانىڭ قاحرامانماراش ايماعىنداعى جەر سىلكىنىسىنەن زارداپ شەككەندەر سانى 31643 ادامعا جەتتى، دەپ حابارلايدى قازاقپارات انادولى اگەنتتىگىنە سىلتەمە جاساپ.
وتكەن دۇيسەنبى، 6-اقپان كۇنى قاحرامانماراشتا ەپيتسەنترى جەتى بالدان اساتىن ەكى جەر سىلكىنىسى بولدى (جەرگىلىكتى ۋاقىت بويىنشا 04:17 دە - 7,7 بالل جانە 13:24 دە - 7,6 بالل) .
جۇزدەگەن افتەرشوكقا ۇلاسقان جەراستى دۇمپۋلەرى ەلدىڭ 10 پروۆينتسياسىندا، سونداي- اق كورشىلەس مەملەكەتتەردە، سونىڭ ىشىندە سيريادا دا سەزىلدى.
پرەزيدەنت رەجەپ تايىپ ەردوعان تابيعي اپات قۇرباندارىنا بايلانىستى تۇركيادا جەتى كۇندىك ۇلتتىق ازا تۇتۋ جاريالادى. تۇركيانىڭ مەملەكەتتىك تۋلارى بۇكىل ەلدە جارتىلاي ءتۇسىرىلدى.
جويقىن جەر سىلكىنىسى كورشىلەس ەلدەردە، سونىڭ ىشىندە سيريا، ليۆان، سولتۇستىك كيپردەگى تۇرىك رەسپۋبليكاسى، گرەكيا كيپرىندە جانە يراكتا دا سەزىلدى.