17:53, 27 - ءساۋىر 2023 | GMT +6
الاكولدە 30 كەلى بالىقپەن ۇستالعان كۇدىكتىنىڭ ۇستىنەن قىلمىستىق ءىس قوزعالدى
تالدىقورعان. قازاقپارات - جەتىسۋ وبلىسىنىڭ الاكول كولىندە موتورلى قايىق، تور جانە زاڭسىز اۋلاعان بالىقتارىمەن براكونەر ۇستالدى، دەپ حابارلايدى قازاقپارات ءتىلشىسى.
جەتىسۋ پوليتسەيلەرى ءوڭىردىڭ بالىق شارۋاشىلىعى ينسپەكتورلارىمەن بىرلەسىپ الاكول كولىندە براكونەرلىكپەن اينالىسقان 44 جاستاعى ەر ادامدى ۇستادى. ۇستالعان ادام كورشى اباي وبلىسىنىڭ تۇرعىنى بولىپ شىقتى. ودان ءتارتىپ ساقشىلارى 30 كەلى زاڭسىز اۋلانعان كوكسەركە بالىعىن تاركىلەدى.
«مەملەكەتكە كەلتىرىلگەن زالال 400 مىڭ تەڭگەدەن اسادى. بۇل فاكت بويىنشا ق ر ق ك- ءنىڭ 335-بابىندا كوزدەلگەن قىلمىستىق ءىس قوزعالدى (بالىق رەسۋرستارىن، باسقا دا سۋ جانۋارلارىن نەمەسە وسىمدىكتەرىن زاڭسىز الۋ) ، زاتتاي ايعاق رەتىندە داراتالشىق تور مەن موتورلى قايىق ىسكە قوسا تىركەلدى» ، - دەدى تابيعات قورعاۋ پوليتسياسىنىڭ اعا ينسپەكتورى باعلان رىمجانوۆ.
بالىق ساتۋ ءۇشىن قابىلداۋ پۋنكتىنە وتكىزىلدى. ودان ءارى جينالعان قاراجات مەملەكەت كىرىسىنە تاپسىرىلادى.