ءماجىلىس ءتوراعاسى: 30 جىلدا عاسىرعا تەڭ كەلەتىن تابىستارعا جەتتىك
ق ر پارلامەنتى ءماجىلىسىنىڭ ءتوراعاسى نۇرلان نىعماتۋلين تاۋەلسىزدىك مەرەيتويىنا ارنالعان حالىقارالىق كونفەرەنتسيادا وسىندا پىكىر ءبىلدىردى، دەپ حابارلايدى قازاقپارات ءتىلشىسى.
«30 جىلدىڭ ىشىندە جاڭا مەملەكەت، جاڭا ەكونوميكا، جاڭا قوعام قۇرىلدى. تاريح تۇرعىسىنان العاندا از عانا ۋاقىت - 30 جىلدىڭ ىشىندە قازاقستان دامىعان ەلدەردىڭ قاتارىنا كىردى. بۇل تۋرالى تۇڭعىش پرەزيدەنتىمىز «تاۋەلسىزدىك تاعلىمى» ماقالاسىندا ايتقانداي، ءبىز ەرەكشەلىكتەرىمىز بەن مۇمكىندىكتەرىمىزدى ەسكەرىپ، «قازاقستان-2030» ستراتەگياسىن مەرزىمىنەن بۇرىن ورىنداپ، ودان كەيىن «قازاقستان-2050» باعدارلاماسىن جاسادىق. وسى ستراتەگيالىق ءىس- جوسپارلارىمىز ءبىزدىڭ ەلىمىزدى ۇلكەن ناتيجەلەرگە جەتكىزدى. ونى الەمدىك ساياساتكەرلەر مەن ساراپشىلار مويىنداپ وتىر. بۇگىندە تاۋەلسىز قازاقستان ءوزىنىڭ مىڭداعان شاقىرىم شەكاراسىن بەكىتكەن، دۇنيەجۇزىنە تاراعان قازاقستاندىقتاردى ءبىر شاڭىراقتىڭ استىنا جيناپ، بۇكىل الەمگە قاجەتتى حالىقارالىق باستامالارعا باستاماشى بولعان تانىمال، بەدەلدى مەملەكەت. وعان دالەل ءبىزدىڭ ەۋروپاداعى قاۋىپسىزدىك جانە ىنتىماقتاستىق ۇيىمىنا ءتوراعالىق ەتكەنىمىز»، - دەدى ءماجىلىس ءتوراعاسى.
سونداي-اق، ول ورتالىق ازيا ەلدەرىنىڭ ىشىندە العاش بولىپ بىرىككەن ۇلتتار ۇيىمىنىڭ قاۋىپسىزدىك كەڭەسىنە تۇراقتى ەمەس مۇشە بولعان دا قازاقستان ەكەنىن ەسكە سالدى.
«بۇكىل الەمگە ايگىلى ەكسپو كورمەسىن ۇيىمداستىردىق. بۇل كورمە ەلباسىنىڭ ەرەن ەرلىگىمەن، پاراساتتى شەشىمىمەن، جاسامپاز يدەياسىمەن دۇنيەگە كەلگەن استانامىز نۇر-سۇلتان قالاسىندا ءوتتى. قازىر ەلوردامىز دۇنيەجۇزى ەلدەرىنىڭ اراسىندا ءدىنارالىق جانە ۇلتارالىق تاتۋلىق ۇعىمىنىڭ ساياسي ديالوگ الاڭىنا اينالدى. سونىمەن بىرگە بۇگىن نۇر-سۇلتان قالاسى تاۋەلسىزدىگىمىزدىڭ ماڭگىلىك ىرگەتاسى جانە شىعىس پەن باتىستى باينالىستىراتىن ەۋرازيا وركەنيەتىنىڭ التىن ورداسى. ال ەلباسىنىڭ تاعى ءبىر تاريحي شەشىمىنىڭ ارقاسىندا اشىلعان تۇركىستان وبلىسى ەۋروپا مەن ازيانى قوساتىن بۇكىل تۇركى الەمىنىڭ رۋحاني ورتالىعى دەپ اتالدى. مىنە ءبىز، وسىلاي 30 جىلدىڭ ىشىندە عاسىرعا تەڭ كەلەتىن تابىستارعا جەتتىك»، - دەى نۇرلان نىعماتۋلين.
