بەس جىلدا ەلىمىزدە 30 مىڭ شاقىرىم جەرگىلىكتى جولدى جوندەۋ كوزدەلىپ وتىر
«نۇرلى جول» باعدارلاماسى تۇجىرىمداماسىنىڭ جوباسىندا وسىلاي كورسەتىلگەن، دەپ حابارلايدى قازاقپارات ق ر ي ي د م باسپا ءسوز قىزمەتىنە سىلتەمە جاساپ.
«ق ر يندۋستريا جانە ينفراقۇرىلىمدىق دامۋ ءمينيسترى رومان سكلياردىڭ توراعالىعىمەن قازاقستان رەسپۋبليكاسىنىڭ 2020-2025-جىلدارعا ارنالعان «نۇرلى جول» ينفراقۇرىلىمدىق دامۋ مەملەكەتتىك باعدارلاماسى تۇجىرىمداماسىنىڭ جوباسى تانىستىرىلدى. جيىنعا ءماجىلىس دەپۋتاتتارى، «قازاقستان تەمىرجولى» ۇ ك» ا ق، «اتامەكەن» ۇ ك پ، «Kazlogistics» كولىك جانە لوگيستيكا ۇيىمدارى مەن قاۋىمداستىعىنىڭ، ق ر ي ي د م سالالىق بولىمشەلەرىنىڭ وكىلدەرى قاتىستى»، دەلىنگەن حابارلامادا.
تۇجىرىمدامانى تالقىلاۋ بارىسىندا 2015-2019-جىلدارعا ارنالعان قولدانىستاعى «نۇرلى جول» مەملەكەتتىك باعدارلاماسى اياسىندا ىسكە اسىرىلعان جوبالاردىڭ ماڭىزدىلىعى ايتىلدى جانە 2020-2025-جىلدارعا ارنالعان جاڭا «نۇرلى جول» مەملەكەتتىك باعدارلاماسىن ازىرلەۋ بويىنشا جالعاستىرىلاتىن جۇمىستاردىڭ نەگىزگى باعىتتارى ايقىندالدى.
ازىرلەنىپ جاتقان مەملەكەتتىك باعدارلامادا جەرگىلىكتى دەڭگەيدەگى جول ينفراقۇرىلىمىن قالپىنا كەلتىرۋگە جانە دامىتۋعا باسىمدىق بەرىلەدى. 2025- جىلعا دەيىن 30 مىڭ شاقىرىم جەرگىلىكتى اۆتوجولدى قالپىنا كەلتىرۋ جوسپارلانۋدا.
وسى مىندەتتى شەشۋ ءۇشىن اۋماقتاردىڭ كولىك ينفراقۇرىلىمىن، ونىڭ ىشىندە بايلانىستىرۋشى ۋچاسكەلەردى، كىرەبەرىستەردى، اينالما جولداردى، جول ايرىقتاردى، سونداي-اق اۋماقتار اراسىنداعى كولىك بايلانىستارىن جاڭعىرتۋ كوزدەلگەن.
اۆتوجول ينفراقۇرىلىمىن جانە كولىك قىزمەتتەرىن دامىتۋ سالاسىندا وبلىستىق جانە اۋداندىق ماڭىزى بار اۆتوموبيل جولدارىن، ەلدى مەكەندەردىڭ كوشە جەلىلەرىن جوندەۋ جانە قايتا جاڭارتۋ جونىندەگى باسىم جوبالاردى جانە «ۇيگە دەيىنگى جول» قاعيداتى بويىنشا كىرەبەرىستەردى قامتۋ جوسپارلانۋدا.
اۋە كولىگى سالاسىندا اۋە كەمەلەرى پاركىن جاڭارتۋدى جانە اۋەجايلاردىڭ ينفراقۇرىلىمىن جاڭعىرتۋدى قوسا العاندا، وڭىرلىك اۆياتسيانى دامىتۋ جونىندەگى شارالار كەشەنى قاراستىرىلاتىن بولادى.
مەملەكەتتىك باعدارلاما مىندەتتەرىنىڭ ءبىرى ينفراقۇرىلىمدىق كەشەننىڭ تەحنولوگيالىق، عىلىمي- ادىستەمەلىك جانە رەسۋرستىق قامتاماسىز ەتىلۋىن ارتتىرۋ.
وسى مىندەتتەردى شەشۋ ءۇشىن باعدارلامادا تەحنولوگيالار ترانسفەرتى، باسقارۋدىڭ زياتكەرلىك جۇيەلەرىن ەنگىزۋ، كولىك كەشەنىن دامىتۋ جانە جەتىلدىرۋ سالاسىندا قولدانبالى عىلىمي زەرتتەۋلەر جۇرگىزۋ، كادر رەسۋرستارىن دامىتۋ جونىندەگى ءىس-شارالار اتقارىلاتىن بولادى.
اۆتوجول ينفراقۇرىلىمىن جانە اۆتو تاسىمالداردى دامىتۋ سالاسىندا 6,6 مىڭ كيلومەتر رەسپۋبليكالىق، 30 مىڭ كيلومەتر جەرگىلىكتى اۆتوجولدار مەن ەلدى مەكەندەردىڭ كوشە-جول جەلىلەرىن جوندەۋ جانە قايتا جاڭارتۋ بويىنشا وتپەلى جانە جاڭا جوبالاردى ىسكە اسىرۋ جوسپارلانعان.
باعدارلامادا ورال، قوستاناي، وسكەمەن، شىمكەنت، اتىراۋ، قىزىلوردا، الماتى قالالارىنداعى اەروۆوكزال كەشەندەرىن قايتا جاڭارتۋ؛ بارلىق كوممۋنيكاتسيالارى بار جەرگىلىكتى اۋە جەلىلەرىنىڭ 11 اۋە ايلاعىن سالۋ، اۋە كەمەلەرىنىڭ ليزينگىن سۋبسيديالاۋ، ترانزيتتىك اۋە تاسىمالداردى دامىتۋ بەلگىلەنگەن.
بايلانىس، ناۆيگاتسيا جانە باقىلاۋ جۇيەسىن دامىتۋ اۆياتسيالىق پەرسونالدى دايارلاۋ جۇيەسىن جەتىلدىرۋمەن بايلانىستىرىلادى.
