جەرتولەدە تۇراتىن 30 جاستاعى قازاق جىگىتىنىڭ حيكاياسى كوپشىلىكتى جىلاتتى
«قازاقستان» ارناسىنىڭ «قارەكەت» باعدارلاماسى مۇحاممەدقاليدىڭ ومىرىنە ارنالعان حاباردى كورەرمەنگە ۇسىندى.
باعدارلاما اۆتورىنىڭ ايتۋىنشا، بۇگىندە جەرتولەنى مەكەن ەتىپ وتىرعان مۇحاممەدقاليدىڭ ءبىر كەزدەرى ۇلكەن ءۇيى دە، اتا- اناسى دا، ارمانى دا بولعان. الايدا وتباسى الاياقتارعا الدانىپ قالدى، اتا- اناسى ومىردەن ءوتتى، جىگىتتىڭ ءوزى دالادا قالعان.
«بۇل جىگىتتىڭ جاعدايى قيىنداۋ. قانشا جىلدان بەرى قيىنشىلىقتا ءومىر ءسۇرىپ كەلە جاتىر. جەرتولەدە تۇرادى. اندا ساندا اس- سۋىن اكەپ تۇرامىز، ءوزى دە ازىعىن تاۋىپ ىشەدى»، - دەيدى مۇحاممەدقاليدىڭ دوسى.
مۇحاممەدقاليدىڭ ايتۋىنشا، اتا- اناسى اۋىر سىرقاتتان قايتىس بولعان.
«بۇل ومىردە اتا- انانىڭ بولماعانى جامان ەكەن. سونىڭ سالدارىنان وسىنداي كۇيگە جەتتىم. جاسىم 30 عا كەلدى. وسىنداي جاعدايعا ۇشىرادىم. جەرتولەدە، ساياباقتا ءومىر سۇرەمىن. دالادا كەتىپ بارا جاتقان جۇپتاردى كورەمىن. ۇيلەنىپ، بالالى بولعىم كەلەدى. جاسىم بولسا كەتىپ بارا جاتىر. ءومىرىمنىڭ ءوتىپ كەتپەگەنىنە سەنگىم كەلەدى»، - دەيدى مۇحاممەدقالي.
