استانادا 30 مەملەكەتتىڭ باسپاشىلارى باس قوسادى
ق ر مادەنيەت جانە سپورت مينيسترلىگىندە شارانى ۇيىمداستىرۋشى كوميتەتتىڭ وتىرىسىندا استانا تاريحىنداعى ەڭ ءىرى كىتاپ كورمەسىنە دايىندىق بارىسى تالقىلاندى.
مينيسترلىكتىڭ باسپا ءسوز قىزمەتىنىڭ حابارلاۋىنشا، «Eurasian Book Fair - 2016» ەۋرازيا حالىقارالىق كورمە- جارمەڭكەسى قازاقستان تاۋەلسىزدىگىنىڭ 25 جىلدىعىنا وراي ۇيىمداستىرىلادى. ق ر مادەنيەت جانە سپورت مينيسترلىگى جانە استانا قالاسى اكىمدىگىنىڭ قولداۋىمەن وتەتىن كورمەنىڭ ۇيىمداستىرۋشىسى - «فوليانت» باسپاسى.
ءىس- شارا ءىرى اعارتۋشىلىق الاڭدا ت م د، ەۋروپا مەن ازيا مەملەكەتتەرىنىڭ باسپا، كىتاپ ساۋداسى، عىلىمي- اعارتۋشىلىق جانە پوليگرافيا كومپانيالاردىڭ باسىن قوسادى. وقىرماندار مەن ساتىپ الۋشىلارعا جاقىن جانە الىس شەت مەملەكەتتەردىڭ كىتاپ شىعارۋ جانە پوليگرافيا سالاسىنداعى جەتەكشى باسپا ۇيلەرىنىڭ زاماناۋي كىتاپ ونىمدەرىنىڭ اسسورتيمەنتى جانە جاڭا تەحنولوگيالارى ۇسىنىلاتىن بولادى.
«Eurasian Book Fair - 2016» ەۋرازيا حالىقارالىق كىتاپ كورمە- جارمەڭكەسى ديرەكسياسى ديرەكتورىنىڭ ورىنباسارى راۋشان تۇرلىنوۆا ءىس- شارانىڭ نەگىزگى تاقىرىبى ەۋرازياشىلدىق يدەياسى بولاتىندىعىن حابارلادى.
«قازاقستان رەسپۋبليكاسىنىڭ پرەزيدەنتى ايتىپ كەتكەندەي، ەۋرازياشىلدىق - مادەني جانە ۇلتتىق بىرتەكتىلىك ساقتالعانداعى الەۋمەتتىك جاڭعىرتۋ مەن ەكونوميكالىق دامۋ بولىپ تابىلادى. سوندىقتان الداعى ۋاقىتتا بولاتىن جارمەڭكەنىڭ كىلت تاقىرىبى رەتىندە ەۋرازياشىلدىق يدەياسى تاڭداپ الىندى»، دەدى ول.
كورمە شەڭبەرىندە كەڭ مادەني باعدارلاما جۇزەگە اسىرىلاتىن بولادى. شارا ۇيىمداستىرۋشىلارىنىڭ اقپاراتىنا قاراعاندا، كورمە- جارمەڭكە جۇمىس ىستەيتىن كۇندەردىڭ ءارقايسىسىنىڭ ءار ساعاتىندا ءتۇرلى مادەني- ساۋىق، عىلىمي شارالار وتكىزىلەدى. بۇنداي شارالاردىڭ قاتارىنا عىلىمي- تاجىريبەلىك كونفەرەنتسيالار، تۇساۋكەسەرلەر، دوڭگەلەك ۇستەلدەر، تانىمال مادەنيەت قايراتكەرلەرى، جازۋشىلار مەن اقىندار، سونىڭ ىشىندە ادەبيەت سالاسىنداعى نوبەل سىيلىعىنىڭ يەگەرلەرىمەن كەزدەسۋ، فورۋمدار، بايقاۋلار مەن ۆيكتورينالار كىرەدى.
كورمەدە ىسكەرلىك سۇحباتتار دا ورىن الادى دەپ كۇتىلۋدە. ءىس-شارا بارىسىندا رەسمي تۇلعالار، باسپا ۇيلەرىنىڭ، كىتاپ ساۋداسى ۇيىمدارىنىڭ باسشىلارى، حالىقارالىق ساراپشىلار، تانىمال جازۋشىلار مەن اقىندار، باسپا جوبالارىن قولدايتىن ۇيىمدار مەن قورلاردىڭ، كىتاپحانا، ءبىلىم بەرۋ جانە عىلىمي قوعامداستىقتاردىڭ وكىلدەرى سالا دامۋىنىڭ وزەكتى ماسەلەلەرىن تالقىلاپ، مەملەكەتتىك، قوعامدىق جانە جانە كاسىپكەرلىك قۇرىلىمداردىڭ رۋحاني- ونەگەلى اعارتۋشىلىق، ءبىلىم جانە مادەنيەت سالاسىندا حالىقارالىق مادەني، ىسكەرلىك بايلانىستارىن جۇزەگە اسىرۋعا بارلىق جاعداي جاسالادى.
ەۋرازيا كىتاپ كورمە- جارمەڭكەسىنە دايىندىق بارىسى تۋرالى كەڭەسكە ق ر مادەنيەت جانە سپورت مينيسترلىگىنىڭ جاۋاپتى حاتشىسى قۋاتجان ۋاليەۆ، «نۇر وتان» پارتياسى ءتوراعاسى ءبىرىنشى ورىنباسارىنىڭ كەڭەسشىسى ءاليا عالىموۆا، «Eurasian Book Fair - 2016» ەۋرازيا حالىقارالىق كىتاپ كورمە- جارمەڭكەسى ديرەكتسياسىنىڭ باسشىلىعى، استانا قالاسىنىڭ اكىمدىگى، ق ر اقپارات جانە كوممۋنيكاتسيالار مينيسترلىگى، ەلوردالىق جوعارى وقۋ ورىندارىنىڭ وكىلدەرى جانە ت. ب. قاتىستى.
