قوستاناي وبلىسىندا ەگىندى القاپتىڭ 30 پايىزعا جۋىعى ورىلدى - فوتو
اقمولا، قوستاناي جانە سولتۇستىك قازاقستان وبلىستارىنىڭ اكىمدەرىمەن وتكىزگەن كەڭەسىندە ەلباسى دا وسى مىندەتتى ءمىنسىز اتقارۋدى جۇكتەگەن بولاتىن. سوڭعى اپتادا توبىل وڭىرىندە كۇن كۇرت ىسىپ، جيىن- تەرىم ناۋقانى قىزۋ قارقىنمەن ءجۇرىپ جاتىر، دەپ جازادى 24.kz.
التىنسارين - ەگىندى ءوڭىر. اۋدان 231 مىڭ گەكتار القاپقا تۇقىم سەپسە، سونىڭ %80- ى بيدايدىڭ ۇلەسىندە. تاجىريبەلى ديقان الەكساندر بورودين كوكتەمگى قولايسىز اۋا رايىنا قاراماستان، ەگىندى ۋاقىتىندا ەكتى. جاز بويى ىلعال، جاڭبىر جەتكىلىكتى بولدى.
«استىق شىعىمى وتە جاقسى. گەكتارىنا 30 سەنتنەردەن تۇرعاندارى بار. ورىلعان ءبىر القاپ 35 سەنتنەردەن ءونىم بەردى. كەيبىر تاناپتار ءسال تومەندەۋ شىعار، ءبىراق جالپى العاندا جامان ەمەس. باستىسى اۋا رايى كەدەرگى كەلتىرمەسە ەكەن»، - دەدى ول.
بۇل شارۋاشىلىقتا ونىمدىلىكتى ارتتىرۋ ءۇشىن ءوزارا بايگە ۇيىمداستىرىلعان. قازىر توبىل ءوڭىرى تامىلجىپ تۇر. سوڭعى اپتادا جاۋىن- شاشىن تىيىلدى. مەحانيزاتورلار مەزگىلمەن ساناسپاي ەڭبەك ەتۋدە. وڭىردەگى ەليەۆاتورلار استىق قابىلداۋعا دايىن. ديقاندار ءۇشىن قۋانىشتى حابار: ازىق- تۇلىك جانە كەلىسىمشارت كورپوراتسياسى بيىل بيدايدى ساپاسىنا قاراي تونناسىن 40-42 مىڭ تەڭگەدەن قابىلداماق.
ەستەرىڭىزگە سالا كەتەيىك، قوستاناي وبلىسىندا بيىل 4,5 مىڭ گەكتاردان استام القاپقا ەگىن سەبىلگەن بولاتىن. قازىرگى تاڭدا سونىڭ % 30- عا جۋىعى ورىلدى.