ەكسپو كەزىندە «بايتەرەكتى» 300 مىڭعا جۋىق ادام تاماشالادى
اتاپ ايتقاندا، ەلورداداعى «بايتەرەك» مونۋمەنتىندە 2017-جىلدىڭ قاڭتارىنان بەرى كۇردەلى جوندەۋ جۇرگىزىلىپ، ماۋسىم ايىندا كوپشىلىك ءۇشىن ەسىگىن قايتا اشقان بولاتىن.
سودان بەرى اتالعان نىسانعا بارۋعا نيەتتىلەر ۇزىن-سونار كەزەككە تۇرىپ جاتقانى جايىندا جازعان بولاتىنبىز.
«ەكسپو-2017» حالىقارالىق كورمەسى وتكەن ۋاقىتتا مونۋمەنتكە 287 مىڭ ادام كەلىپ، ونىمەن تانىسىپ شىقتى»، - دەپ ايتىلعان «استانا بايتەرەك» ج ش س- ءنىڭ «قازاقپاراتقا» بەرگەن مالىمەتىندە.
وسى ورايدا اتالعان كورمە وتكەن ءۇش ايدىڭ ءارقايسىسىندا شامامەن 90 مىڭنان استام ادام مونۋمەنتكە بارعان.
بەلگىلى بولعانداي، 2004-جىلدان بەرى مونۋمەنتكە قازاقستاننان جانە شەتەلدەن 8 ميلليونننان استام ادام كەلگەن. ولاردىڭ اراسىندا ءبىرقاتار مەملەكەتتەردىڭ باسشىلارى دا بار.
جالپى، استانا كۇنىن اتاپ ءوتۋ شارالارى باستالعالى مونۋمەنتتىڭ ماڭىندا ەلىمىزدىڭ باسقا وڭىرلەرىنەن كەلگەن قوناقتاردىڭ جانە شەتەلدىك تۋريستەردىڭ قاراسى قالىڭدادى.
ديسپەتچەردىڭ سوزىنە قاراعاندا، جاز كەزىندە مونۋمەنتتەگى «ايالى الاقان» تاڭباسىنا الاقانىن قويۋعا نيەتتى قالا مەيماندارىنىڭ سانى كۇرت ارتقان. نەگىزىنەن، وسىنداي كەزەك مونۋمەنت الدىندا جىل سايىن بايقالادى.
اۆتور: رۋسلان عابباسوۆ
