شەت ەلدەگى قازاقتار كۇن سايىن 300 دەن استام ۆيزاعا تاپسىرىس بەرەدى

استانا. قازاقپارات - ۇكىمەتتىڭ بۇگىنگى وتىرىسىندا ق ر سىرتقى ىستەر ءمينيسترىنىڭ ءبىرىنشى ورىنباسارى مۇحتار تىلەۋبەردى شەتەلدەگى ەتنيكالىق قازاقستاردىڭ ۆيزا الۋى بويىنشا ەسەپ بەردى، دەپ حابارلايدى قازاقپارات ءتىلشىسى.

«ستاتيستيكاعا سايكەس، 2016 -جىلى شەت ەلدەگى ەتنيكالىق قازاقتارعا 81756، ال اعىمداعى جىلدىڭ 1 -قاڭتار مەن 15 -قىركۇيەك ارالىعىندا 56440 ۆيزا بەرىلدى. قازاقستان رەسپۋبليكاسىنىڭ شەت ەلدەگى مەكەمەلەرىنە قازاقستاندىق ۆيزالاردى راسىمدەۋ ءۇشىن كۇن سايىن 300 دەن استام ەتنيكالىق قازاقتار ءوتىنىش بىلدىرەدى»، - دەيدى .

ونىڭ ايتۋىنشا، بيىلدان باستاپ قانداستارىمىز ءۇشىن ءبىرىنشى رەت ءوتىنىش بەرىلسە، ءبىر جىلعا دەيىن، ەكىنشى رەت ءۇش جىلعا دەيىن تەگىن ۆيزالار بەرىلە باستادى.

ايتا كەتەيىك، ۇكىمەتتىڭ بۇگىنگى وتىرىسىندا تامارا قاسىم قىزى كوشى-قون ساياساتىنىڭ 2017-2020 -جىلدارعا ارنالعان تۇجىرىمدامانىڭ جوباسىن تانىستىردى. اتالعان قۇجاتتا شەت ەلدەگى ەتنيكالىق قازاقتارمەن، ولاردىڭ ىشىندە دارىندى ءارى ىسكەر ازاماتتارمەن تىعىز بايلانىس ورناتۋعا دا نەگىزگى باسىمدىق بەرىلگەن.

جوعارى بىلىكتى مامانداردى جەڭىلدەتىلگەن تارتىپپەن جۇمىسقا الۋ جايى دا قاراستىرىلىپ قويعان. ءمينيستردىڭ سوزىنە قاراعاندا، كوشى-قون ساياساتىنا قاتىستى زاڭناما وزگەرگەلى بەرى شەتەلدەگى قانداستارىمىزدىڭ ەلگە ورالۋ كورسەتكىشى ءوستى.