ەر جانىبەك باتىردىڭ 300 جىلدىعى موڭعوليادا تويلاندى - فوتو
قىركۇيەكتىڭ 12- كۇنى اتاۋلى شارا بايان- ولگەي قالاسىنىڭ مۇعالىمدەر مەكتەبىنىڭ ءماجىلىس زالىندا «ەر جانىبەك جانە موڭعوليا قازاقتارى» اتتى حالىقارالىق عىلىمي كونفەرەنتسيامەن باستالدى. ХVIII عاسىرداعى جوڭعار حاندىعى مەن قازاق حاندىعى اراسىنداعى قايشىلىق، ەكى ەلدىڭ ىشكى، سىرتقى ساياساتى، قوعامدىق دامۋى، وزگەرىستەرى جانە وسى ءداۋىر تۇلعالارىنىڭ ءبىرى ەر جانىبەك باتىردىڭ ءومىربايانى، قوعامداعى ءرولى، ەر جانىبەك باتىرعا قاتىستى كوزقاراستاردى عىلىمي ناقتى دەرەكتەرگە سۇيەنە وتىرىپ تالقىلانعان عىلىمي كونفەرەنتسيا ءوتتى. كونفەرەنتسيادا ەر جانىبەكتىڭ باتىردىڭ ءومىربايانى، تاريحتا اتقارعان ۇلى ىستەرى، تاريحتاعى ورنى، باتىردىڭ قوعامدىق ساياسي ۇستانىمى، ەل مۇراتى جونىندەگى كوزقاراستارى ورتاعا سالىنىپ، ناقتى تاريحي دەرەكتەرمەن دايەكتىلەنىپ، تالقىلاندى.
عىلىمي كونفەرەنتسيا بايان- ولگەي ايماعىنىڭ قۇرىلتاي ءتوراعاسى ءلاززاتحان بۇراڭ ۇلى، ايماق اكىمى باكەي اعىپار ۇلى، دۇنيەجۇزى قازاقتارى قاۋىمداستىعىنىڭ ءبىرىنشى ورىنباسارى تالعات ماماشيەۆ، حالىقارالىق «ەر جانىبەك» قورىنىڭ پرەزيدەنتى ماقسۇت تەمىربايەۆ سىندى ەل اعالارىنىڭ قۇتتىقتاۋ سوزدەرىمەن اشىلىپ، يسلام قابىش ۇلى، شىناي راحمەت ۇلى، حابساتتار ومار ۇلى، مۇقامەتقازى ءمۇقامادي ۇلى، احمەت توقتاباي سىندى تاريحشى عالىمداردىڭ، جازۋشىلاردىڭ عىلىمي دەرەكنامالىق باياندامالارىمەن جالعاسىن تاپتى.
بايان- ولگەي قالاسىنداعى تاعى ءبىر اتاۋلى شارا - قالا ورتالىعىنداعى داڭعىلداردىڭ بىرىنە ەر جانىبەك بەرداۋلەت ۇلىنىڭ اتى بەرىلگەندىگى بولدى. سونىمەن بىرگە كەلىنتوبە دەپ اتالاتىن قالانىڭ كىرەبەرىسىنە ەر جانىبەك باتىردىڭ ەڭسەلى ەسكەرتكىشىنە تاعان قۇيىلىپ، تۇساۋكەسەر ءراسىمى ءوتتى.
تويدىڭ ءبىرىنشى كۇنى «التايعا ەل قوندىرعان ەر جانىبەك» اتتى حالىقارالىق اقىندار ايتىسىنىڭ باستالۋىمەن جالعاسىن تاپتى. ايماقتىق ۇلتتىق تەاتردا وتكەن ايتىستىڭ ءبىرىنشى كۇنىندە ءسوز سىناسقان اقىنداردىڭ 12 سى ايتىستىڭ ەكىنشى كۇنىنە جولداما الدى.
13- قىركۇيەك كۇنى ولگەي قالاسىنىڭ ورتالىق الاڭىندا مەرەكەلىك جالپى حالىقتىق كونتسەرت ۇيىمداستىرىلىپ، ايماقتىق سپورت كەشەنىندە قازاق كۇرەسى، تۇيە پالۋان سايىسى باستالدى. قازاق ۇلتتىق تەاترىندا حالىقارالىق اقىندار ايتىسىنىڭ ەكىنشى اينالىمى جالعاسىن تاپتى. ايتىستىڭ ەكىنشى كۇنىندە ءادىلقازىلار القاسى ايتىس اقىندارىنا ناق مايداندا جەرەبە تارتقىزىپ، ايتىستى جالعاستىردى.
ايتىستىڭ كوركىن قىزدىرعان قىتايدىڭ التاي ايماعىنان كەلگەن اقىن قاناتبەك ءزايتوللا ۇلى، بايولكەلىك اقىن ەرلان داۋلەت ۇلى، شۇعايىپ سەزىمحان ۇلى، شىڭگىلدىك اقىن ەربولات سەرعاجى ۇلى سىندى وتكىر ءتىل، ورامدى وي ايتىپ، باتىر بابامىزدىڭ رۋحى مەن بۇگىنگى قازاق جۇرتىنىڭ كوڭىلىندەگى تۇيتكىلدەرىن ءداپ باسىپ جۇرت كوڭىلىنەن شىعىپ، حالىق القاۋىنا يە بولدى.
14- قىركۇيەك ءدۇبىرلى تويدىڭ ءۇشىنشى كۇنىندە ەر جانىبەك باتىردىڭ رۋحىنا ارنالعان اقىندار ايتىسى مەن جىر ءمۇشايراسىنىڭ ماراپاتتاۋ ءراسىمى سارىكول جايلاۋىندا ءوتتى.
باتىر رۋحىنا ارنالىپ قۇران وقىلىپ، اس بەرىلگەن سارىكول جايلاۋىنا 60 قا جۋىق كيىز ءۇي تىگىلىپ، كوكپار، قىزقۋار، اۋدارىسپاق، تەڭگە ءىلۋ، بۇركىتشىلەر سايىسى سىندى ۇلتتىق سپورت ويىندارى ءوتتى. دونەن بايگە، الامان بايگە تويعا جينالعان جۇرتتىڭ دەلەبەسىن قوزدىرىپ، ۇلى تاۋدىڭ ءتوسىن قيقۋعا تولتىردى.
ارنايى بايان- ولگەيدەن: مەيىرجان اۋەلحان ۇلى
سۋرەتتەردى تۇسىرگەن: ەرلىك ەرجان ۇلى
erjanibek.com
