30 كۇندىك بىتىمگەرلىككە ايىرباس رەتىندە رەسەي ا ق ش پەن ە و- عا تالاپتار قويدى
استانا. KAZINFORM - اتىستى 30 كۇن توقتاتۋ ءۇشىن رەسەي ا ق ش پەن ە و- دان ۋكرايناعا قارۋ-جاراق جەتكىزۋدى توقتاتۋدى تالاپ ەتىپ وتىر، دەپ حابارلايدى DW اقپارات اگەنتتىگى.
كرەملدىڭ باسپا ءسوز حاتشىسى دميتري پەسكوۆ امەريكالىق ABC تەلەارناسىنا مالىمدەگەندەي، ۆلاديمير پۋتين ەگەر كيەۆتىڭ وداقتاستارى ونى قارۋ-جاراقپەن قامتاماسىز ەتە بەرسە، ۋكراينا ۇسىنعان ۇزاققا سوزىلعان اتىستى توقتاتۋ يدەياسىن جوققا شىعارادى.
- بۇل ۋكراينا ءۇشىن ارتىقشىلىق بولادى. ۋكراينا تولىق جۇمىلدىرۋدى جالعاستىرىپ، مايدان شەبىنە جاڭا اسكەرىن جىبەرەدى. ول بۇل ۋاقىتتى جاڭا اسكەرىن جاتتىقتىرۋ جانە قازىردىڭ وزىندە سوعىسىپ جاتقاندارعا دەمالۋ ءۇشىن پايدالانادى. ەندەشە، ءبىز نەلىكتەن ۋكرايناعا مۇنداي ارتىقشىلىق بەرۋىمىز كەرەك؟ - دەپ سۇرادى پەسكوۆ.
پۋتيننىڭ باسپا ءسوز حاتشىسى ءبىر كۇن بۇرىن مۇنداي بىتىمگە كەلۋ مۇمكىندىگىن مويىندادى، ءبىراق «نيۋانستار ەسكەرىلۋى ءتيىس» ەكەنىن اتاپ ءوتتى. 9-مامىر كۇنى كەشكە ول ا ق ش پرەزيدەنتى دونالد ترامپ العاش رەت ۇسىنعان كەزدە كرەمل ۇزاق مەرزىمدى اتىستى توقتاتۋ باستاماسىن قولداعانىن اتاپ ءوتتى.
ۋكراينا پرەزيدەنتى ۆلاديمير زەلەنسكي 7-مامىردا سويلەگەن سوزىندە كيەۆتىڭ رەسەيمەن اتىستى كەمىندە 30 كۇنگە توقتاتۋ تۋرالى ۇسىنىسى كۇشىندە ەكەنىن مالىمدەدى.
- ءبىز ديپلوماتياعا مۇمكىندىك بەرەتىن بۇل ۇسىنىستى قايتارمايمىز، - دەدى ول.
بۇعان دەيىن ۇلى بريتانيا، فرانسيا، گەرمانيا جانە پولشا باسشىلارى 10-مامىردا كيەۆكە باراتىنى تۋرالى جازعان بولاتىنبىز.
