قىتايدان كەلگەن قانداستارىمىز ءۇيى ورتەنگەن وتباسىعا 3,5 ميلليون تەڭگە اقشا جيناپ بەردى

تالدىقورعان. قازاقپارات - تالدىقورعاندا قىستىڭ قارا سۋىعىندا دالادا قالعان وتباسىنا كومەك كورسەتىلدى. بۇگىن ءۇيى ورتەنىپ كەتكەن باسپانانىڭ يەسى سۇيىنبەك جۇمابايدىڭ قولىنا اقشالاي قارجى تابىس ەتىلدى.

سونداي اق «قايىرىمدى جاندار توبى» ولارعا 15 باس قوي بەردى، دەپ حابارلايدى قازاقپارات ءتىلشىسى. قوماقتى قاراجات الەۋمەتتىك جەلى ارقىلى جينالعان. «ۆيچات» جەلىسى ارقىلى وتانداستارىمىز ءۇيسىز قالعان جانۇيانىڭ تاعدىرىنا بەي- جاي قاراماي، بىردەن كومەك كورسەتۋدى شەشكەن. اينالاسى ون كۇننىڭ ىشىندە 3,5 ميلليون تەڭگە اقشا جينالىپتى.

«قايىرىمدى جاندار توبى 2016 -جىلدىڭ مامىر ايىنان باستاپ ەرىكتى جانداردان قۇرىلدى. ۆيچات جەلىسى ارقىلى ءتۇرلى اۋىر جاعدايعا تاپ بولعان ادامدارعا كومەك كورسەتۋ ماقساتىندا قۇرىلعانبىز. باستاپقىدا 50 ادام ەدىك، قازىر سانىمىز 350 گە جۋىقتادى»، - دەيدى «قايىرىمدى جاندار» ەرىكتىلەر توبىنىڭ مۇشەسى اسىلجان مومىش ۇلى.

 بۇل اتالعان توپتىڭ جاساپ وتىرعان كومەگىنىڭ العاشقىسى ەمەس. ولار بۇعان دەيىن دە تالاي مارتە كومەككە زارۋ جاندارعا قول ۇشىن سوزىپ، دەمەۋشىلىك جاساعان. بىلتىردان بەرى 13 وتباسىعا كومەكتەسىپ، 8 ادامنىڭ ەمىنە اقشا جيناپ بەرگەن. قازىر تاعى 4 ادامعا كومەك كورسەتۋ ءۇشىن قارجى جيناپ جاتىر. ال اتالعان توپتىڭ مۇشەلەرى قىتايدان كەلگەن قانداستار.

ايتا كەتۋ كەرەك، سۇيىنبەك جۇمابايدىڭ ءۇيىن قاڭتاردىڭ 11 نەن 12سىنە قاراعان ءتۇنى قىزىل جالىن جالمادى. ال جانۇيا مۇشەلەرى سول كۇنى ەكى بالاسىن ەرتىپ، قوناققا كەتكەن.

 

 اۆتور: سامال قابىشيەۆا