10:43, 28 - ماۋسىم 2015 | GMT +5
تۇركيا سيريامەن اراداعى شەكاراعا بيىكتىگى 3,5 مەترلىك بەتون قابىرعا تۇرعىزباق
استانا. قازاقپارات - يراك جانە شام يسلام مەملەكەتى لاڭكەستىك ۇيىمىنىڭ سودىرلارى مەن شەكارادان زاڭسىز وتەتىن كەلىمسەكتەردىڭ جولىن كەسۋ ءۇشىن تۇرىك ۇكىمەتى كورشى سيريامەن شەكاراعا بيىكتىگى 3,5 مەتر بولاتىن بەتون قابىرعا تۇرعىزباق.
وسى ماقساتتا تۇركيانىڭ ىشكى ىستەر مينيسترلىگى «قاۋىپسىزدىك بەلدەۋى» جوباسىن قابىلداپ، سيرياعا ىرگەلەس جاتقان حاتاي، گازيانتەپ، كيليس پەن شانلىۋرفا قالاسىنا 20 ميلليون ليرا قارجى ءبولدى، دەپ حابارلايدى تۇرىكتىڭ haberler.com اقپاراتتىق سايتى.
تۇركيا مەن سيريا شەكاراسىنىڭ ۇزىندىعى 911 شاقىرىمدى قۇرايدى. جوبا اياسىندا شەكارا شەبىندە قابىرعا قالانىپ، ونىڭ اينالاسى تىكەن سىممەن قورشالادى. وعان قوسا تاۋلىكتىك باقىلاۋ جۇرگىزەتىن بەينەكامەرالار دا ورناتىلاتىن بولدى، دەپ جازادى 24.kz.
