استانا جولدارىنداعى كەپتەلىستى شەشۋ ءۇشىن 2 كوپىر سالىنادى

بۇل تۋرالى قالالىق كولىك جانە جول- كولىك ينفراقۇرىلىمىن دامىتۋ باسقارماسىنىڭ باسشىسى جانسۇلتان ساپاربايەۆ ءمالىم ەتتى، دەپ حابارلايدى قازاقپارات ءتىلشىسى.
«قالادا كولىك كەپتەلىسى ءالى دە وزەكتى. اسىرەسە، ماڭگىلىك ەل داڭعىلى بويىندا، اتاپ ايتقاندا مينيسترلىكتەر ءۇيى مەن ۇلتتىق بانك ارالىعىندا. بۇرىن جارتى ساعاتتاپ تۇرساق، قازىر 1,5 ساعاتقا دەيىن سوزىلادى. ماڭگىلىك ەل داڭعىلىمەن قاتار ورنالاسقان ءا. بوكەيحانوۆ كوشەسىندە دە جاعداي ءماز ەمەس، جوندەۋ كەرەك. وسى ماسەلەلەر قالاي شەشىلمەك؟» - دەپ قالالىق ءماسليحاتتىڭ دەپۋتاتى نۇرداۋلەت ورازحانوۆ ساۋال جولداعان.
دەپۋتات ساۋالىنا قالالىق كولىك جانە جول- كولىك ينفراقۇرىلىمىن دامىتۋ باسقارماسىنىڭ باسشىسى جانسۇلتان ساپاربايەۆ جاۋاپ بەردى.
«جالپى سول جاعالاۋداعى كەپتەلىس ماسەلەسىن شەشۋ ءۇشىن قوسىمشا ەكى كوپىر سالۋ قاجەت. العاشقىسى - تاۋەلسىزدىك، ەكىنشى كوپىر - ۇلى دالا داڭعىلىندا. بۇگىندە تاۋەلسىزدىك داڭعىلىنداعى كوپىر قۇرىلىسىنىڭ مونتاجداۋ جۇمىسى باستالدى. رەسپۋبليكالىق بيۋدجەتتەن قارجى كۇتىپ وتىرمىز. كوپىر قۇرىلىسى ءۇشىن 7 ملرد تەڭگەگە جۋىق قاراجات كەرەك. ۇلى دالا بويىندا سالىناتىن كوپىر بويىنشا مەردىگەر كومپانيا انىقتالدى. ول جەردە جۇمىس بۇگىن باستالادى. كوپىردى قالا كۇنىنە وراي قولدانىسقا بەرۋگە تىرىسامىز. 2 كوپىر ىسكە قوسىلعاننان كەيىن ماڭگىلىك ەل، تۇران، قابانباي باتىر داڭعىلدارىنىڭ بويىنداعى كەپتەلىس رەتتەلۋى ءتيىس»، - دەيدى ول.
ودان بولەك، باسقارما باسشىسىنىڭ ايتۋىنشا، بۇقار جىراۋ كوشەسىندەگى بىلتىر باستالعان كوپىر بيىل پايدالانۋعا بەرىلمەك. تاياۋدا عانا ەلوردا كوشەسىندەگى اسفالتتىڭ وپىرىلعانىن حابارلاعان ەدىك.