قازاقستاننىڭ مۇناي وڭدەۋ زاۋىتتارى قوسىمشا 2 مىڭ توننا اۆياوتىن وندىرەدى
بۇل تۋرالى قازاقپارات قازمۇنايگازدىڭ باسپا ءسوز قىزمەتىنە سىلتەمە جاساپ حابارلايدى.
«قازمۇنايگاز» اۆياوتىن ءوندىرۋدىڭ قازان ايىنداعى جوسپارى تولىق ورىندالعانىن جەتكىزدى.
«وسى جىلدىڭ قازان ايىندا وتاندىق مۇناي وڭدەۋ زاۋىتتارى اۆياوتىن ءوندىرۋ جوسپارىن تولىق ورىنداۋدا. قازاننىڭ 28 ءى كۇنگى جاعداي بويىنشا شىمكەنت جانە اتىراۋ مۇناي وڭدەۋ زاۋىتتارى 36,2 مىڭ توننانى وندىرگەن. ق ر ەنەرگەتيكا مينيسترلىگىنىڭ تاپسىرماسىن ەسكەرىپ، وتاندىق مۇناي وڭدەۋ زاۋىتتارى وسى ايدىڭ سوڭىنا دەيىن قوسىمشا 2 مىڭ توننا اۆياوتىن وندىرەدى. جالپى وسى ايدا اتىراۋ، شىمكەنت جانە پاۆلودار زاۋىتتارىنان بارلىعى 42,4 مىڭ توننا اۆياوتىن جونەلتىلدى»، - دەلىنگەن حابارلامادا.
كومپانيانىڭ حابارلاۋىنشا، قازىرگى ۋاقىتتا وتاندىق مۇناي وڭدەۋ زاۋىتتارىندا 6,9 مىڭ توننا اۆياوتىن قورى بار.
بۇعان دەيىن ق ر يندۋستريا جانە ينفراقۇرىلىمدىق دامۋ مينيسترلىگى ەلوردا اۋەجايى مەن «سكات» اۋە كومپانياسىنىڭ اۆياوتىن جەتىسپەۋشىلىگىنە قاتىستى مالىمدەمەلەرىنە پىكىر بىلدىرگەن بولاتىن.