نازاربايەۆ ۋنيۆەرسيتەتىنىڭ تاجىريبەسى بويىنشا تاعى 2 جوعارى وقۋ ورنى قۇرىلادى
بۇل تۋرالى ۇكىمەت وتىرىسىندا «BILIMDI ŪLT» بارشاعا ارنالعان ساپالى ءبىلىم» ۇلتتىق جوباسىن تانىستىرۋ كەزىندە ءبىلىم جانە عىلىم ءمينيسترى اسحات ايماعامبەتوۆ ءمالىم ەتتى، دەپ حابارلايدى قازاقپارات ءتىلشىسى.
«قولجەتىمدى جانە ساپالى تەحنيكالىق جانە كاسىپتىك بىلىممەن قامتاماسىز ەتۋگە توقتالساق، 2025 -جىلعا قاراي سۇرانىسقا يە ماماندىقتار بويىنشا جاستاردى تەگىن تەحنيكالىق جانە كاسىپتىك بىلىممەن %100 قامتۋ كوزدەلگەن. كوللەدجدەرگە اكادەميالىق دەربەستىك بەرىلەدى جانە بارلىق وقۋ باعدارلاماسى ەڭبەك نارىعىنىڭ تالاپتارىنا سايكەس جاڭارتىلادى. كوللەدجدەردى زاماناۋي وقۋ- وندىرىستىك شەبەرحانالارمەن جابدىقتاۋ جۇمىستارى جۇرگىزىلەدى. بارلىق كوللەدجدەردە WorldSkills تالاپتارىن ەسكەرە وتىرىپ، قۇزىرەتتىلىكتەردى انىقتايتىن دەمونستراتسيالىق ەمتيحان ەنگىزىلەدى. ءدۋالدى وقىتۋعا قاتىساتىن كاسىپورىنداردى ىنتالاندىرۋ ەسەبىنەن 2025 -جىلعا قاراي ءدۋالدى وقىتۋمەن قامتۋ وسەدى»، - دەدى ا. ايماعامبەتوۆ.
سونىمەن قاتار ۇلتتىق جوبادا جوعارى وقۋ ورىندارىنىڭ باسەكەگە قابىلەتتىلىگىن ارتتىرۋ ەسكەرىلگەن.
«سۇرانىسقا يە ماماندىقتار بويىنشا ءبىلىم گرانتتارىنىڭ سانى وسەدى. وقۋ باعدارلامالارى جاڭا جاعدايلارعا بەيىمدەلەدى. ول ءۇشىن يننوۆاتسيالىق باعدارلامالار ازىرلەنەدى، ءبىلىم بەرۋ باعدارلامالارى ەڭبەك نارىعىنىڭ تالاپتارىنا سايكەس جاڭارتىلادى. قازاقستاندىق جوعارى وقۋ ورىندارىنىڭ باسەكەگە قابىلەتتىلىگىن ارتتىرۋ ماقساتىندا 20 اكادەميالىق ارتىقشىلىق ورتالىعى جانە نازاربايەۆ ۋنيۆەرسيتەتىنىڭ تاجىريبەسى بويىنشا 2 وزىق جوعارى وقۋ ورنى قۇرىلادى. سونىمەن بىرگە 2025 -جىلدىڭ سوڭىنا دەيىن شەتەلدىڭ 5 جوعارى وقۋ ورنىنىڭ فيليالىن اشۋ جوسپارلانۋدا»، - دەدى مينيستر.