اتاقتى بريتاندىق اقىندار 2-دارەجەلى «دوستىق» وردەنىمەن ماراپاتتالدى - فوتو
ماراپات قازاقستان رەسپۋبليكاسى پرەزيدەنتى قاسىم-جومارت توقايەۆتىڭ جارلىعىمەن قازاقستان مەن ۇلىبريتانيا جانە سولتۇستىك يرلانديا قۇراما كورولدىگى اراسىنداعى دوستىق پەن ىنتىماقتاستىقتى نىعايتۋعا قوسقان ەلەۋلى ۇلەسى ءۇشىن، سونداي-اق قازاقتىڭ ۇلى اقىنى، فيلوسوف جانە اعارتۋشىسى اباي قۇنانباي ۇلىنىڭ مۇراسىن حالىقارالىق ارەنادا ىلگەرىلەتۋگە سىڭىرگەن ەڭبەگى ءۇشىن بەرىلدى.
ەكى اقىن اباي شىعارمالارىنىڭ اعىلشىن تىلىندەگى العاشقى تولىق جيناعىن كەمبريدج ۋنيۆەرسيتەتى باسپاسىندا دايىنداپ، باسۋ جوباسىنا تىكەلەي قاتىستى. «ۇلتتىق اۋدارما بيۋروسى» ق ق- مەن (ۇ ا ب) سەرىكتەستىكتە جۇزەگە اسىرىلعان جوبا شەڭبەرىندە تانىمال بريتاندىق اقىن پروفەسسور ش. و’برايەن اباي پوەزياسىنىڭ اۋدارماسىن دايىندادى، ال قارا سوزدەردى ءتارجىمالاۋ مىندەتى بەلگىلى شوتلاند جازۋشىسى جانە اقىنى پروفەسسور دج. بەرنسايدقا جۇكتەلدى.
اعىلشىن تىلىندەگى باسىلىم - اتى اڭىزعا اينالعان قازاق اقىنىنىڭ شىعارمالارىن الەمنىڭ ون تىلىندە جاريالاۋ جونىندەگى ۇاب- نىڭ اۋقىمدى جوباسىنىڭ ءبىر بولىگى. وردەندەردى تابىستاۋ راسىمىندە قازاقستاننىڭ ۇلىبريتانياداعى ەلشىسى ەرلان ىدىرىسوۆ قازاقستان رەسپۋبليكاسى تاۋەلسىزدىگىنىڭ 30 -جىلدىعىن مەرەكەلەۋ جىلىندا جوعارى ناگرادالاردى تاپسىرۋدىڭ سيمۆولدىق ءمانى بار ەكەنىن اتاپ ءوتتى. ول سونداي-اق پروفەسسورلار دج. بەرنسايد پەن ش. و’برايەننىڭ جاھاندىق ءاعىلشىنتىلدى اۋديتوريا اراسىندا ۇلى ابايدىڭ مۇراسىن تانىمال ەتۋگە جانە ەكى ەل مادەنيەتتەرىن ءوزارا جاقىنداستىرۋ ىسىنە قوسقان زور ۇلەستەرىن اتاپ ءوتتى. ايتا كەتكەن ءجون، پروفەسسور شون و’برايەن - بريتاندىق اقىن، سىنشى، دراماتۋرگ، تەلەجۇرگىزۋشى، جازۋشى، رەداكتور، نيۋكاسل ۋنيۆەرسيتەتىنىڭ شىعارماشىلىق جازۋدىڭ بۇرىنعى پروفەسسورى. ونىڭ ماراپاتتارىنا ت. س. ەليوت سىيلىعى، «Forward Prize» ، سومەرسەت موەم سىيلىعى جانە باسقالار كىرەدى.
«گارديان»، «يندەپەندەنت» جانە «تايمس» گازەتتەرىندە ماقالالار جاريالاعان. ال پروفەسسور دجون بەرنسايد - شوتلاند اقىنى جانە جازۋشىسى، سەنت- ەندريۋس ۋنيۆەرسيتەتىنىڭ اعىلشىن ءتىلى پروفەسسورى. پوەزيا مەن پروزانىڭ ءبىرقاتار جيناقتارىن جاريالاعان، تەلەحيكايالار مەن راديو شوۋلارعا ارنالعان ستسەنارييلەردىڭ اۆتورى. ت. س. ەليوت، «Forward Prize» ، و. گەنري سىيلىقتارىنىڭ جانە باسقا دا كوپتەگەن ماراپاتتاردىڭ لاۋرەاتى.
ونىڭ شىعارمالارىنىڭ اۋدارمالارى گەرمانيا، فرانسيا، يسپانيا، يتاليا، تۇركيا، نيدەرلاند، ق ح ر، يندونەزيا، حورۆاتيا، برازيليا جانە ارگەنتينادا باسىلعان.