پوليتسەيلەر پويىزدا جوعالعان 2 ميلليونعا جۋىق تەڭگەنى تاۋىپ بەردى
وسى جىلدىڭ 3-اقپانىندا ەربولات ءامىرحانوۆ ەسىمدى قاراعاندى قالاسىنىڭ تۇرعىنى نۇرلى جول تەمىرجول ۆوكزالىنداعى جەلىلىك پوليتسيا بولىمشەسىنە كەلىپ، ءىرى كولەمدەگى اقشاسى سالىنعان سومكەسىن جوعالتىپ العاندىعىن، ونى ىزدەۋگە كومەك سۇراپ، ءوتىنىش ءبىلدىردى.
ونىڭ ايتۋىنشا، قاراعاندى ستانتسياسىندا پويىزدان تۇسكەن سوڭ، تاكسي توقتاتقان. كولىكتە وتىرعان كەزدە عانا اقشا سالىنعان سومكەسىنىڭ جوق ەكەنىن بايقاعان. ۆوكزالعا قايتا اينالىپ كەلگەن كەزدە ءوزى تۇسكەن پويىز بۇل ۋاقىتتا ءجۇرىپ كەتكەن.
«بۇدان سوڭ، تاكسيمەن پويىزدىڭ ارتىنان نۇر-سۇلتان قالاسىنا كەلدىم. ىلە-شالا نۇرلى جول تەمىرجول ۆوكزالىنداعى جەلىلىك پوليتسيا بولىمشەسىنىڭ پوليتسەيلەرىنەن اقشامدى تاۋىپ بەرۋ جونىندە كومەك سۇرادىم»، - دەيدى ەربولات. ءوتىنىش تۇسە سالىسىمەن تەمىر جول ۆوكزالىنىڭ پاترۋلدىك پوليتسيا توبىنىڭ پوليتسيا سەرجانتى بەرىك اققاليەۆ جەدەل ىزدەستىرۋ ءىس-شاراسىنا كىرىسەدى.
«ءوتىنىش يەسى جوعالعان سومكەدە ۇلكەن كولەمدەگى اقشاسىنىڭ بار ەكەندىگىن ايتىپ، قاتتى الاڭداپ تۇرعانىن جەتكىزدى. ەگەر سومكە جولاۋشىلار پويىزىندا قالعان بولسا، ونى وزىمەن بىرگە الىپ كەتەتىن ادامداردىڭ بولۋى دا ىقتيمال عوي»، - دەيدى پوليتسيا سەرجانتى.
بەرىك ەڭ الدىمەن، سومكە يەسى وتىرعان ۆاگون جولسەرىگىمەن، باسقا دا جولاۋشىلارمەن جەدەل تۇردە بايلانىس جاسايدى. جەدەل ارەكەت پەن ۇيلەسىمدى جۇرگىزىلگەن شارالاردىڭ ناتيجەسىندە 1900000 تەڭگە قاراجات سالىنعان سومكە تابىلىپ، يەسىنە تابىستالدى. سومكەسى قولىنا تيگەن ە. ءامىرحانوۆ كولىك پوليتسەيلەرىنىڭ قىراعىلىقتارى مەن كاسىبي شەبەرلىكتەرىنە قايران قالىپ، ولاردىڭ ءوز قىزمەتتىك مىندەتتەرىن ادال اتقارعاندارى ءۇشىن جۇرەكجاردى العىسىن ءبىلدىردى. كولىك پوليتسەيلەرى بوسا، ەلىمىزدىڭ اۋە جانە تەمىر جول نىساندارىندا ادامداردىڭ كوپ شوعىرلاناتىندىعىن تاعى دا ەسكە سالىپ، جولاۋشىلارعا باعالى، قۇندى زاتتارى مەن اقشا قاراجاتتارىنا بارىنشا مۇقيات بولۋعا شاقىرادى.