2-قازان. قازاقپارات كۇنتىزبەسى

اتاۋلى كۇندەر

حالىقارالىق زورلىققا قارسى كۇن ب ۇ ۇ باس اسسامبلەياسى تاراپىنان 2007 -جىلعى 27 - ماۋسىمدا (ب ۇ ۇ A/RES/61/271 قارارى) بەلگىلەندى. 2007 -جىلدان باستاپ جىل سايىن 2 - قازاندا كۇش قولدانباۋ فيلوسوفياسىنىڭ نەگىزىن قالاۋشى ماحاتما گانديدىڭ تۋعان كۇنىندە اتاپ وتىلەدى. وسى حالىقارالىق كۇننىڭ ماقساتى، باس اسسامبلەيانىڭ قارارىندا ايتىلعانىنداي، بەيبىتشىلىك، توزىمدىلىك، تۇسىنىستىك جانە كۇش قولدانباۋ مادەنيەتىن بەكىتۋگە قول جەتكىزۋ. قارار بارشا ادامدى وسى كۇندى تويلاۋعا شاقىرادى.

حالىقارالىق الەۋمەتتىك پەداگوگ كۇنى 2009 -جىلدىڭ مامىر ايىندا كوپەنگاگەندە الەۋمەتتىك پەداگوگتاردىڭ XVII حالىقارالىق كونفەرەنتسياسى بولىپ ءوتتى. بۇل شاراعا 44 ەلدىڭ وكىلدەرى قاتىستى. كونفەرەنتسيا بارىسىندا بارلىق الەۋمەتتىك پەداگوگتاردىڭ حالىقارالىق مەرەكەسىن بەكىتۋ شەشىمى قابىلداندى.

ەستە قالار وقيعالار

1982 -جىلى نۇرعيسا تىلەنديەۆ اتىنداعى اكادەميالىق فولكلورلىق- ەتنوگرافيالىق وركەستر قۇرىلدى. وركەستر عاسىرلار بويى باعا جەتپەس مادەني مۇرا بوپ كەلە جاتقان قازاق ۇلتتىق مۋزىكالىق اسپاپتارىنىڭ باي قورىمەن تانىسۋ مۇمكىندىگىن بەرەدى. «وتىرار سازى» وركەسترىندە دومبىرا مەن قوبىزدان تىس جەتىگەن، شەرتەر، شاڭقوبىز، مەسقوبىز، سىرناي، سازسىرناي، سىبىزعى، سونداي- اق اساتاياق، داۋىلپاز، تۇياقتاس، قوڭىراۋ، قايراق سياقتى سوقپالى اسپاپتاردىڭ داۋىسىنان سۋسىنداۋعا بولادى.

1991 -جىلى كەڭەس وداعىنىڭ باتىرى، تۇڭعىش قازاق عارىشكەرى توقتار اۋباكىروۆ ك س ر و عارىشكەر- ۇشقىشى الەكساندر ۆولكوۆ، اۆستريا رەسپۋبليكاسىنىڭ ازاماتى فرانتس فيبەك ۇشەۋى «سويۋز تم-13» عارىش كەمەسىمەن عارىشقا اتتاندى. سونىمەن قاتار وسى كۇنى ەلباسى نۇرسۇلتان نازاربايەۆ بايقوڭىر عارىش ايلاعىنان رەسپۋبليكانىڭ ۇلتتىق اەروعارىشتىق اگەنتتىگىن قۇرۋ تۋرالى جاريا ەتتى.

1992 -جىلى ت م د- دا جاڭا ۇلگىدەگى العاشقى جوعارى وقۋ ورنى - قازاقستان مەنەدجمەنت، ەكونوميكا جانە بولجاۋ ينستيتۋتى (كيمەپ) اشىلدى.

2009 -جىلى قازاقستان اشىق داۋىس بەرۋ جولىمەن 2 جىل مەرزىمگە ستاندارتتاۋ جونىندەگى حالىقارالىق كەڭەسكە سايلاندى. قازاقستاننىڭ كانديداتۋراسى ي س و كەڭەسىنە ا ق ش، جاپونيا، يزرايل، اۆستريا، پولشا، وڭتۇستىك افريكا رەسپۋبليكاسى جانە تاعى باسقا ەلدەردىڭ اتتارىنان ۇسىنىلدى. ۇيىم 700-دەن استام حالىقارالىق ۇيىممەن ىنتىماقتاستىق قۇرعان جانە الەمنىڭ 162 ەلىنىڭ باسىن قوسىپ وتىر. ال ي س و كەڭەسىنە 18 ەل كىرەدى.

2013 -جىلى الماتىدا قازاقستان كينواكادەمياسىنىڭ رەسمي تۇردە اشىلۋى ءوتتى.

2013 -جىلى استانادا «D'arts» ساڭىراۋ اكتەرلاردىڭ تۇڭعىش كاسىبي تەاترى اشىلدى. بۇگىنگى تاڭدا ترۋپپا مۇكىس جانە ناشار ەستيتىن سەگىز اكتەردان قۇرالعان.

2015 -جىلى ق ر ءبىلىم جانە عىلىم مينيسترلىگىنىڭ باسقارۋىنداعى الماتى، قاراعاندى، شىمكەنت قالالارىنىڭ رەسپۋبليكالىق اسكەري مەكتەپ- ينتەرناتتارى ق ر قورعانىس مينيسترلىگىنىڭ قاراماعىنا بەرىلدى. ال بۇل مەكتەپتەردىڭ تاربيەلەنۋشىلەرى ۇلاندىقتار دەپ اتالاتىن بولادى.

2016 -جىلى مەكسيكا قۇراما شتاتتارىنىڭ دەپۋتاتتار كونگرەسىندە (مەكسيكا پارلامەنتىنىڭ تومەنگى پالاتاسى) قازاقستاننىڭ مەكسيكاداعى ەلشىلىگىنىڭ باستاماسىمەن «مەكسيكا- قازاقستان» پارلامەنتتىك دوستىق توبىنىڭ رەسمي قۇرىلۋ سالتاناتى بولدى.

2019 -جىلى سولتۇستىك قازاقستان وبلىسى ءۋاليحانوۆ اۋدانىندا ارحەولوگتار تاريحي ماڭىزى بار التىن وردا داۋىرىنە جاتاتىن كونە مازارلاردىڭ ورنىن تاپتى. سىلەتى وزەنىنىڭ بويىندا XIV - XV عاسىرلارعا جاتاتىن كونە مازارلاردىڭ ورنى تابىلدى. كونە كەسەنەلەردىڭ ورنىن ەلىمىزدەگى اتاقتى ارحەولوگتار اشقان. سولاردىڭ ءبىرى - تيمۋر سماعۇلوۆ. ول - تانىمال عالىم، ورتا عاسىرلار بويىنشا مامان. الەمگە تانىلعان «ءۇرجار حانشايىمى» تاريحي جادىگەرىن تاپقان. ال اناتولي پلەشاكوۆ – سولتۇستىك قازاقستاندىق پروفەسسور، بوتاي مادەنيەتىن اشۋشىلاردىڭ ءبىرى.

2019 -جىلى قازاقستان رەسپۋبليكاسىنىڭ ۇلتتىق بانكى نومينالدىق قۇنى 5000 جانە 500 تەڭگەلىك «ۇكى» ەسكەرتكىش كۇمىس مونەتالارىن اينالىمعا شىعاردى.