قازاقپارات كۇنتىزبەسى: 2-قىركۇيەك

ەستە قالار وقيعالار

1992-جىلى كارەليا جەرىندە الپىس جىلعا جۋىق ۋاقىت جات ەلدە جەرلەنگەن قازاق حالقىنىڭ ءىرى تۇلعاسى، اقىن، جازۋشى، قوعام قايراتكەرى، XX عاسىردىڭ باس كەزىندەگى قازاق مادەنيەتى مەن ادەبيەتىنىڭ ايتۋلى وكىلى ءمىرجاقىپ دۋلاتوۆتىڭ سۇيەگىن تورعاي وبلىسى، جانگەلدين اۋدانىنداعى ءوزىنىڭ ەسىمىمەن اتالاتىن اۋىلعا اكەلىپ جەرلەۋ ءۇشىن ارناۋلى دەلەگاتسيا ارنايى ساپارعا اتتاندى.

1994 -جىلى الماتىدا رايىمبەك باتىر كەسەنەسىنىڭ سالتاناتتى اشىلۋ ءراسىمى بولدى.

1995 -جىلى ەلباسى ن. ءا. نازاربايەۆتىڭ جارلىعىمەن جازۋشى موريس داۆيدوۆيچ سيماشكو «قازاقستاننىڭ حالىق جازۋشىسى» اتاعىن الدى. سيماشكو موريس داۆيدوۆيچ (1924-2000) - قازاقستاننىڭ حالىق جازۋشىسى، قازاقستان رەسپۋبليكاسى پرەزيدەنتىنىڭ بەيبىتشىلىك جانە رۋحاني كەلىسىم سىيلىعىنىڭ، قازاقستان مەملەكەتتىك سىيلىعىنىڭ لاۋرەاتى، ەكىنشى دۇنيەجۇزىلىك سوعىس ارداگەرى.

ودەسسا پەداگوگيكالىق ينستيتۋتىن، قازاق مەملەكەتتىك ۋنيۆەرسيتەتىن بىتىرگەن. جازۋشى شىعارمالارىنىڭ باستى تاقىرىبى - قازاقستان، رەسەي، ورتالىق ازيا جانە تاياۋ شىعىستىڭ تاريحى مەن ەجەلگى مادەنيەتى بولدى. كوركەم اۋدارما سالاسىندا ءى. ەسەنبەرليننىڭ «كوشپەندىلەر» تريلوگياسىن، تاعى باسقالاردىڭ شىعارمالارىن ورىس تىلىنە ءتارجىمالادى.

2007 -جىلى قازاقستاندا العاشقى رەت كۇرد ءتىلىنىڭ وقۋلىعى جارىق كوردى. اۆتورى - «باربانگ» كۇردتەر قاۋىمداستىعىنىڭ پرەزيدەنتى كنياز ميرزويەۆ. قازاقستاندا كۇرد ۇلتىنىڭ 50 مىڭعا جۋىق وكىلى تۇرادى. كۇرد ۇلتى وكىلدەرىنىڭ باسىم بولىگى وڭتۇستىك قازاقستان، جامبىل جانە الماتى وبلىستارىندا.

اتالعان جەرلەردە كۇرد ۇلتىنىڭ مادەنيەت ورتالىقتارى جانە كۇرد تىلىندە وقىتاتىن مەكتەپتەر اشىلعان. رەسپۋبليكامىزدىڭ الماتى، شىمكەنت جانە تاراز قالالارىندا ۇلتتىق- مادەنيەت ورتالىقتارى جۇمىس ىستەيدى، ورىس تىلىندە اي سايىنعى «كۋردە زانا» گازەتى شىعادى.

«باربانگ» قازاقستانداعى كۇردتەر قاۋىمداستىعى - قازاقستان حالقى اسسامبلەياسىنا ءبىرىنشى بولىپ كىرگەن قوعامدىق ۇيىم.

2011 -جىلى ۆەنادا ەۋروپاداعى قاۋىپسىزدىك جانە ىنتىماقتاستىق ۇيىمى شتاب-پاتەرىنىڭ ورتالىق زالدارىنىڭ ءبىرى اۆستريالىق حوفبۋرگ سارايىندا قازاقستانداعى سەمەي يادرولىق پوليگونىنىڭ جابىلعانىنا 20 جىل تولۋىنا ارنالعان فوتوكورمە اشىلدى. كورمەدە سەمەي پوليگونىنىڭ قۇرىلۋ تاريحى، «سەمەي- نيەۆادا» يادرولىق قارۋعا قارسى قوزعالىسى جانە تاۋەلسىز قازاقستاننىڭ جاھاندىق يادرولىق قارۋسىزدانۋ مەن ونى تاراتپاۋ ىسىنە قوسقان ۇلەسى فوتوسۋرەتتەر تىلىمەن باياندالعان.

2011 -جىلى ماسكەۋدە قازاقستان رەسپۋبليكاسى مەن گۆاتەمالا رەسپۋبليكاسى اراسىندا ديپلوماتيالىق قاتىناستار ورناتۋ جونىندە بىرلەسكەن كومميۋنيكەگە قول قويىلدى. قۇجاتقا رەسەيدەگى قازاقستان رەسپۋبليكاسىنىڭ توتەنشە جانە وكىلەتتى ەلشىسى زاۋىتبەك تۇرىسبەكوۆ پەن ونىڭ گۆاتەمالدىق ارىپتەسى ارتۋرو دۋارتە قول قويدى.

2015 -جىلى استانا ۋاقىتىمەن ساعات 10.37 دە بايقوڭىر عارىش ايلاعىنان «سويۋز تما-18م» زىمىران-تاسىمالداعىشى ۇشىرىلدى، ونىڭ بورتىندا قازاقستاننىڭ ءۇشىنشى عارىشكەرى ايدىن ايىمبەتوۆ بولدى.

ايدىن ايىمبەتوۆ بورتقا وزىمەن بىرگە قازاقستان رەسپۋبليكاسىنىڭ، قازاقستان حالقى اسسامبلەياسىنىڭ جانە «ەكسپو-2017» حالىقارالىق كورمەسىنىڭ تۋلارىن الىپ ۇشتى. 2015 -جىلى باتىس ساحاراعا ب ۇ ۇ ميسسياسىمەن ءبىرىنشى بولىپ اتتانعان ق ر قارۋلى كۇشتەرىنىڭ وفيتسەرى، كاپيتان تەمىرلان ءمۇساپىروۆ قازاقستانعا ورالدى.

ول افريكا ەلىندە تۋرا ءبىر جىل قىزمەت ەتىپ، اسكەري بايقاۋشى مىندەتتەرىن اتقاردى.

2019 -جىلى ۇلتتىق قوعامدىق سەنىم كەڭەسى قۇرىلدى. ونىڭ نەگىزگى ماقساتى - جۇرتشىلىقتىڭ، ساياسي پارتيالاردىڭ، ازاماتتىق قوعامنىڭ وكىلدەرىمەن كەڭىنەن تالقىلاۋ نەگىزىندە مەملەكەتتىك ساياساتتىڭ وزەكتى ماسەلەلەرى بويىنشا ۇسىنىستار مەن ۇسىنىمدار تۇجىرىمداۋ بولىپ تابىلادى.

2019 -جىلى قازاقستان پرەزيدەنتى قاسىم-جومارت توقايەۆ پارلامەنت پالاتالارىنىڭ بىرلەسكەن وتىرىسىندا قازاقستان حالقىنا جولداۋىن جاريالاپ، ەلىمىزدىڭ الداعى دامۋىنا قاتىستى باعىتتارىن ايقىنداپ كورسەتتى.

«سىندارلى قوعامدىق ديالوگ - قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىندا مەملەكەت باسشىسى مەملەكەتتىك باسقارۋ جۇيەسىنىڭ تيىمدىلىگىن ارتتىرۋ، ازاماتتاردىڭ قۇقىقتارىن، ەركىندىكتەرى مەن قاۋىپسىزدىگىن قامتاماسىز ەتۋ، دامىعان جانە ينكليۋزيۆتى ەكونوميكانى قالىپتاستىرۋ، حالىقتى الەۋمەتتىك قامتۋ سالاسىن جاڭعىرتۋ، سونداي-اق وڭىرلەردىڭ الەۋەتىن نىعايتۋعا باعىتتالعان ءبىرقاتار باستامالارىن ۇسىندى.