دەنيس تەننىڭ ءولىمى: الماتىلىق بويجەتكەن 2 ايعا قاماۋعا الىندى
بۇل تۋرالى قازاقپارات تىلشىسىنە قالالىق سوتتىڭ باسپا ءسوز قىزمەتىنەن حابارلادى.
بۇعان دەيىن ق ر باس پروكۋراتۋراسى سپورتشى دەنيس تەننىڭ ولىمىنە قاتىستى ءۇشىنشى ادامنىڭ ۇستالعانى تۋرالى حابارلاعان بولاتىن.
الماتى قالالىق سوتى باسپا ءسوز قىزمەتىنىڭ مالىمەتىنشە، ۇستالعان ادامعا قاتىستى 2 ايعا قاماۋ تۋرالى بۇلتارتپاۋ شاراسى قولدانىلدى.
«المالى اۋداندىق سوتىنا جانار تولىبايەۆانى ەكى ايعا قاماۋعا الۋ تۋرالى بۇلتارتپاۋ شاراسىن سانكتسيالاۋعا ءوتىنىش ءتۇستى. ايەل ادام ق ر ق ك 434-بابى مەن 188-بابىنىڭ 2-بولىمىمەن 2 ايعا قاماۋعا الىندى»، - دەدى قالالىق سوتتان.
ايتا كەتۋ كەرەك، ق ر ق ك 434-بابى بويىنشا، بولعان نەمەسە جوسپارلانعان قىلمىس تۋرالى اقپاراتتى ۋاقتىلى حابارلاماعانى ءۇشىن كۇدىكتى 14 ميلليون 400 مىڭ تەڭگە ايىپپۇل تولەۋى نەمەسە 6 جىلعا باس بوستاندىعىنان ايىرىلۋى مۇمكىن.
سونداي-اق، بويجەتكەن كۇدىكتى ق ر ق ك 188-بابى ۇرلىق جاساعانى ءۇشىن ايىپتالۋدا. ەگەر ونىڭ اتالعان باپ بويىنشا كىناسى دالەلدەنگەن جاعدايدا، ول 1000 ا ە ك، ياعني 2 ميلليون 405 مىڭ ايىپپۇل تولەپ نەمەسە 3 جىلعا دەيىن سوتتالادى.
ەسكە سالساق، قازاقستاندىق مانەرلەپ سىرعاناۋشى دەنيس تەن 19 -شىلدە كۇنى پىشاق جاراقاتىنان قازا بولعان ەدى. وقيعا قۇرمانعازى بايسەيىتوۆا كوشەلەرىنىڭ قيىلىسىندا 19 -شىلدەدە تۇسكى ساعات 15:00 شاماسىندا بولعان. سپورتشى كولىگىنىڭ ايناسىن ۇرلاماق بولعان ەكى ادامنىڭ ۇستىنەن تۇسكەن. ارادا باستالعان جانجالدىڭ سالدارىنان ۇرىلار دەنيس تەنگە پىشاق سۇعىپ العان. ول وڭ جاق سانىنىڭ جوعارعى تۇسىنا جاراقات الدى. 25 جاستاعى تەن ءۇش ليتر قان جوعالتىپ، اۋرۋحاناعا وتە اۋىر جاعدايدا جەتكىزىلدى. ءبىراق الماتى قالالىق دەنساۋلىق ساقتاۋ باسقارماسىنىڭ باسشىسى سەرىكبول مۋسينوۆ قوسىمشا قان قاجەت ەمەستىگىن جانە رەسۋرستار جەتكىلىكتى ەكەندىگىن ءمالىم ەتكەن بولاتىن.
2,5 ساعاتقا جالعاسقان رەانيماتسيالىق شارالارعا قاراماستان، اۋرۋحانا دارىگەرلەرى ونىڭ ومىرىنە اراشا تۇسە المادى. ساعات 17.30-دا وليمپيادا جۇلدەگەرى قايتىس بولدى.
ادام ءولتىرۋ بابىمەن قىلمىستىق ءىس قوزعالدى.
كەيىن بەلگىلى بولعانداي، سپورتشىنىڭ ولىمىنە قاتىسى بار ەكى كۇدىكتىنىڭ ءبىرى ۇستالىپ، ول قىلمىسىن مويىندادى. ەكىنشى كۇدىكتى - 1994 -جىلى تۋعان قىزىلوردا وبلىسى، قارماقشى اۋدانى، اقاي اۋىلىنىڭ تۋماسى ارمان قۇدايبەرگەنوۆكە ىزدەۋ جاريالاندى.
سونداي-اق، دەنيس تەننىڭ ولىمىنە كۇدىكتى نۇرالى قياسوۆ كۇزەتپەن المالى اۋداندىق سوتىنا جەتكىزىلگەن.
ال دەنيس تەننىڭ ءولىمى بويىنشا كۇدىكتى ەكىنشى ادام ارمان قۇدايبەرگەنوۆ ۇستالعان بولاتىن.
