تۇركىستان وبلىسى حالقىنىڭ سانى 2 ميلليونعا جۋىقتادى
بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە تۇركىستان وبلىستىق ستاتيستيكا دەپارتامەنتىنىڭ باسشىسى ايدار ابىلدابەكوۆ مالىمدەدى، دەپ حابارلايدى قازاقپارات.
دەپارتامەنت باسشىسىنىڭ سوزىنشە، اعىمداعى جىلدىڭ العاشقى ماۋسىمداعى ەسەبى بويىنشا تۇركىستان وبلىسى حالقىنىڭ سانى - 1 ميلليون 955219 ادامعا جەتكەن. ونىڭ %19,5 قالادا تۇرادى. قالعان 80,5 ادام اۋىل-ايماق تۇرعىندارى. ال، اعىمداعى جىلدىڭ قاڭتار-مامىر ايلارىندا حالىقتىڭ تابيعي ءوسىمى 17448 ادامعا جەتتى. بۇل وتكەن جىلمەن سالىستىرعاندا 2,8 پايىزعا ارتىق.
«كوشى-قونمەن وبلىسقا 38689 ازامات كەلگەن. ال، باسقا ايماقتى قالاپ، جەر اۋىستىرعاندار - 77524. ونىڭ ىشىندە 8605 ادام - قازاقستاننىڭ وزگە وبلىستارىنا، 60 ادام - دوستاس ەلدەرگە، 6 ادام - الىس شەت ەلدەرگە كەتكەن. زەرتتەۋ قورىتىندىسىنا سۇيەنسەك، وبلىس حالقىنىڭ 61,8 پايىزى - جۇمىسسىز. ەكى قولعا ءبىر كۇرەك تاپپاي ءجۇر. ورتاشا جالاقى مولشەرى - 102 مىڭ تەڭگە. ەڭ تومەن جالاقى سارىاعاش اۋدانىندا تىركەلسە، باقۋاتتىلار سوزاق اۋدانىندا بولىپ وتىر. ولار وندا ۋران ءوندىرۋ كاسىپورىندارىندا ەڭبەك ەتەدى»، - دەدى ايدار ابىلدابەكوۆ.
وبلىستىق ستاتيستيكا دەپارتامەنتى باسشىلىعىنىڭ مالىمدەۋىنشە، وڭىردە پايدالانۋعا بەرىلگەن تۇرعىن ءۇيدىڭ كولەمى بىلتىرعى جىلمەن سالىستىرعاندا 30 پايىزعا ارتقان. بريفينگتە بۇدان بولەك، كوممۋنالدىق نەسيەگە قاتىستى سۇراقتارعا دا جاۋاپتار بەرىلدى.
اۆتور: اينۇر اقبايەۆا
