استانادا مەنينگيتكە شالدىعۋ كۇدىگىمەن 2 جاسار ءسابي اۋرۋحاناعا ءتۇستى

استانا. قازاقپارات - استاناداعى اۋرۋحانالاردىڭ بىرىنە مەنينگيتكە شالدىعۋ كۇدىگىمەن 2 جاسار ءسابي جاتقىزىلدى، دەپ حابارلايدى قازاقپارات ءتىلشىسى قالالىق دەنساۋلىق ساقتاۋ باسقارماسىنا سىلتەمە جاساپ.

«بالا (2 جاس، 1 اي) كەشە، 4 - ماۋسىم كۇنى، قالالىق بالالار جۇقپالى اۋرۋلار اۋرۋحاناسىنا ءتۇستى. جانساقتاۋ بولىمىندە جاتقانىنا ەكىنشى تاۋلىك بولدى. الدىن الا قويىلعان دياگنوز: «مەنينگوكوككتىق ينفەكسيا، جايىلعان ءتۇرى (مەنينگيت)، اۋىرلىعى جوعارى»، - دەدى مەكەمەدەگىلەر.

سونداي- اق، باسقارما وكىلدەرى ناۋقاس بالانىڭ دەنساۋلىق جاعدايى تۋرالى ايتتى.

«جاسالىپ جاتقان تەراپيانىڭ ارقاسىندا جاقسارۋ بەلگىلەرى بار. بالا ەسىن بىلەدى، بەلسەندىلىگى ءسال تومەن. باكتەريولوگيالىق زەرتتەۋلەر ءجۇرىپ جاتىر. دياگنوزدى راستاۋ ءۇشىن باكتەريولوگيالىق ماتەريال ۇلتتىق ساراپتاما ورتالىعىنىڭ رەفەرەنس- زەرتحاناسىنا جىبەرىلدى»، - دەدى دەنساۋلىق ساقتاۋ باسقارماسىنان.