فۋتبول الاڭىنا جۇگىرىپ شىققان جىگىت «استاناعا» 2 ميلليون تەڭگە تولەيدى
استانا قالاسىنىڭ الماتى اۋداندىق سوتى وسىنداي شەشىم شىعاردى، دەپ حابارلايدى قازاقپارات كلۋبتىڭ سايتىنا سىلتەمە جاساپ.
استانا قالاسى الماتى اۋداندىق سوتىنىڭ شەشىمى بويىنشا فۋتبول بۇزاقىسى شامسۋللو فايزيەۆ «استانا» كلۋبىنا 1968150 تەڭگە تولەۋى ءتيىس.
ەسكە سالا كەتسەك، 2017-جىلى 23- قازاندا ەلورداداعى «استانا ارەنا» ستاديونىندا «استانا» مەن «ۆيللياررەالوم» اراسىنداعى (يسپانيا) ۋ ە ف ا ەۋروپا ليگاسى توپتىق كەزەڭىنىڭ ماتچىندا شامسۋللو فايزيەۆ بۇزاقىلىق نيەتپەن الاڭعا جۇگىرىپ شىعىپ، ماتچقا كەدەرگى كەلتىرمەك بولعان.
وسى وقيعا ءۇشىن ۋ ە ف ا «استانا» فۋتبول كلۋبىنا 5 مىڭ ەۋرو كولەمىندە ايىپپۇل سالدى. ەلوردانىڭ فۋتبول كلۋبى وسى سومانى ءوندىرىپ الۋ ءۇشىن فايزيەۆتىڭ ۇستىنەن تالاپ-ارىز بەردى.
ءىس ماتەريالدارىن قاراعان استانا قالاسى الماتى اۋداندىق سوتى ش. فايزيەۆتەن «استانا» كلۋبىنا 1968150 تەڭگە ءوندىرۋ جونىندەگى شەشىم شىعاردى.
«ەگەر وسىنداي وقيعالار ەلوردا كلۋبىنىڭ ەۋروپالىق كلۋبتىق تۋرنيرلەرىندە جانە قازاقستان بىرىنشىلىگىنىڭ ويىندارىندا قايتالانسا ۋ ە ف ا نەمەسە ق ف ف «استانا» كلۋبىنا اتالعان سومادان كوپ ايىپپۇل سالادى. سوندىقتان ەلوردالىق فۋتبول كلۋبى سوت ورگاندارى ارقىلى بۇزاقىلاردان ايىپپۇلعا كەتكەن شىعىندارىن تولىق كولەمدە ءوندىرىپ الۋدى تالاپ ەتەدى»، - دەلىنگەن كلۋبتىڭ سايتىندا.
