قازاق- وزبەك شەكاراسىندا 2 جاڭا بەكەت قۇرىلادى
بۇل تۋرالى بۇگىن ق ر ۇكىمەتىنىڭ وتىرىسىندا ەلىمىزدىڭ قارجى ءمينيسترى باقىت سۇلتانوۆ ايتتى، دەپ حابارلايدى قازاقپارات.
«ءبىز 2017 -جىلى سالىقتىق جانە كەدەندىك تەكسەرۋلەردىڭ سانىن 45 پايىزعا قىسقارتتىق. ەندى ءبىز مينيسترلىك الدىنا قويىلعان جاڭا مىندەتتەردى ەسەپكە الا وتىرىپ، شتات سانىن وڭتايلاندىرۋعا كىرىسەتىن بولامىز. مەملەكەت باسشىسىنىڭ تاپسىرماسىنا سايكەس ءبىز باقىلاۋ- قاداعالاۋ فۋنكتسيالارىن جۇزەگە اسىرعان شامامەن 600 شتات بىرلىگىن قىسقارتامىز جانە باسقا جۇمىس ۋچاسكەسىنە اۋىستىرامىز»، - دەدى ول.
ونىڭ ايتۋىنشا، ەڭ الدىمەن قازاق- وزبەك شەكاراسىندا تاۋار اعىمىنىڭ وسۋىنە جانە وزبەكستانمەن ۇكىمەتارالىق كەلىسىم بويىنشا مىندەتتەمەلەردى ورىنداۋعا بايلانىستى كەدەن قىزمەتى ءۇش بەكەتتە تاۋلىك بويى جۇمىسى رەجىمىنە اۋىسادى. بۇعان باسقا، 2 جاڭا باقىلاۋ وتكىزۋ پۋنكتى قۇرىلادى. ولارعا شامامەن 124 ادام قىزمەتكەر قاجەت.
«ەكىنشىدەن جۇمىس رەجىمى 24/7 جاڭا تەڭىز پورتى اۋماعىنداعى «قۇرىق» وتكىزۋ پۋنكتىن تولىق جاساقتاۋ قاجەت. وعان شامامەن 77 ادام مامان كەرەك. ۇشىنشىدەن، سىبايلاس جەمقورلىقتى تومەندەتۋ ماقساتىندا كەدەن بەكەتتەرىن ۆاحتا ادىسىنە كوشىرۋ جۇمىسى ۇسىنىلادى. مۇندا دا قوسىمشا شتات قاجەت»، - دەدى باقىت سۇلتانوۆ.
