كۋبانىڭ 2 مىڭ تۇرعىنى تەگىن ينتەرنەت پايدالاناتىن بولدى

استانا. قازاقپارات - گاۆانانىڭ تۇرعىنى 67 جاستاعى مارگاريتا ماركەز جاڭا جىل قارساڭىندا ەرەكشە سىيلىق الدى، ونىڭ ۇيىنە تەگىن ينتەرنەت قوسىلدى.

بۇل ۇلكەن جەتىستىك، ويتكەنى كۋبادا دۇنيەجۇزىلىك جەلىگە قوسىلعاندار سانى وتە از. ءومىر بويى ۋنيۆەرسيتەتتە وقىتۋشى بولىپ جۇمىس ىستەگەن ماركەز حانىم استانانىڭ تاريحي ورتالىعىن ينتەرنەتكە قوسۋ بويىنشا تەستىلىك باعدارلاماعا ەنگەن 2 مىڭ قاتىسۋشىنىڭ ءبىرى بولدى. كۋبانىڭ 11,2 ميلليون تۇرعىنىنىڭ 5 پايىزىندا عانا ۇيدەگى ينتەرنەت بار. ونى قوسۋ ءۇشىن كوممۋنيستىك ۇكىمەتتەن رۇقسات تالاپ ەتىلەدى. قالعان تۇرعىندار Wi-Fi-دى پايدالانا الادى. ونى ءبىر ساعات قولدانۋعا ەلدەگى ورتاشا جالاقىنىڭ بەس پايىزى كولەمىندە اقى تالاپ ەتىلەدى. «ناۋرىزدا عالامتورعا اقىسىن تولەۋدى باستايمىز. بۇل قولىمىزدان كەلە مە، بىلمەيمىن. ەڭ باستىسى، قىس بويى تەگىن ينتەرنەت پايدالاناتىن بولدىق»، - دەدى ول Independent باسىلىمىنا بەرگەن سۇحباتىندا.