ماڭعىستاۋ اۋرۋحاناسىندا 2 جاسار بالاعا ەرەكشە وتا جاسالدى
بۇل وتا اۋرۋحانادا تۇڭعىش رەت جاسالدى.
وعان «جۇرەكتىڭ باستى تامىرلارى ترانسپوزيتسياسى» دەگەن دياگنوز قويىلعان.
«بالانى استانا قالاسىنداعى بالالار كارديوحيرۋرگياسى ماماندارى قاراعان جانە وسى اقاۋدى جويۋ ءۇشىن وتاعا كەزەككە تۇرعىزىلعان. كەزەك ۋاقىتى وتە ۇزاق بولعاندىقتان اتا-اناسى ۋاقىت وزدىرماۋ ءۇشىن وتانى ماڭعىستاۋدا جاساتۋعا شەشىم قابىلدادى.
وتا بارىسىندا دياگنوزدىڭ قاتەرلى ەكەنى بەلگىلى بولدى. كارديوحيرۋرگتار بىردەن 3 تۇزەتۋدى ورىندادى: جۇرەكشە مەن قارىنشانىڭ اراسىن جاماپ (بالانىڭ جۇرەك تىندەرىمەن)، قولقا جانە جۇرەكتىڭ وكپە ارتەرياسى اراسىنداعى پاتولوگيالىق كەمىستىكتى جويدى»، - دەدى «ماڭعىستاۋ وبلىستىق اۋرۋحاناسى» كمك ديرەكتورى نۇرلان تىلەپوۆ.
«العاشىندا زوندپەن تەكسەرۋ كەزىندە ءبىز استانالىق دارىگەرلەردىڭ دياگنوزىن («جۇرەكتىڭ وڭ جاق قارىنشاسىنان تامىرلاردىڭ شىعۋى») راستادىق. ءبىراق، وتا بارىسىندا باستى تامىرلاردىڭ وزگەرگەن ترانسپوزياسى انىقتالدى. الدىڭعى دياگنوزبەن وتا كولەمى بىردەي بولعانمەن، بۇل دياگنوز ايتارلىقتاي قيىن بولدى جانە بالانىڭ قارىنشاسىنىڭ دا وزگەرگەنى بەلگىلى بولدى.
وسىنداي اناتوميالىق ەرەكشەلىكتەر ءبىراز تەحنيكالىق قيىندىقتار تۋدىردى، ءبىراق ءبىز قارىنشا اراسىنداعى اقاۋدى جاماۋ، جۇرەكشەلەر اراسىنداعى اقاۋدى، قولقا جولدارىن قوسۋ وتاسىن ءساتتى جاسادىق. بالانىڭ جاعدايى تۇراقتى ءبىراق اۋىر، جاساندى تىنىس الۋ اپپاراتىمەن دەم الىپ جاتىر. دەنە قىزۋى 39 گرادۋسقا دەيىن كوتەرىلدى، جۇرەك قاعىسى بۇزىلعان، بۇل وتادان كەيىنگى قالىپتى جاعداي»، - دەدى «م و ا» كارديوورتالىعىنىڭ جەتەكشىسى جەڭىس قوزىبايەۆ.
وتا بەس ساعاتقا سوزىلدى. وعان 3 حيرۋرگ (ۇشەۋى دە «بولاشاق» باعدارلاماسىمەن ماسكەۋدە وقىعان، فرانسيا، يتاليا، يسپانيا، گوللانديادا ماماندانعان)، 2 انەستەزيولوگ (ولاردىڭ ءبىرى يۋري گۋليايەۆ، ماسكەۋ ق. ا. ن. باكۋليەۆ اتىنداعى رەسەي مەديتسينا عىلىمدارى اكادەمياسى، جۇرەك-تامىر حيرۋرگياسى ع ز ي بالالار جان ساقتاۋ ءبولىمىنىڭ مەڭگەرۋشىسى) قاتىستى. رەسەيلىك انەستەزيولوگ كارديوحيرۋرگيانىڭ جاڭا تەحنولوگيالارىن جەرگىلىكتى ماماندارعا ۇيرەتۋ ءۇشىن اي سايىن اقتاۋ قالاسىنا كەلەدى.