ساۋد ارابياسىنىڭ بيلىگى زيارات ەتۋشىلەرگە قۇراننىڭ 2 ميلليون كوشىرمەسىن تاراتادى

استانا. قازاقپارات - بيىلعى جىلى ساۋد ارابياسىندا قاجىلىق پارىزىن وتەگەن زيارات ەتۋشىلەرگە ەكى ميلليون قۇران كوشىرمەسى تاراتىلادى.

بۇل تۋرالى ت ا س س وسى ەلدىڭ يسلام ىستەرى مينيسترلىگىنە سىلتەمە جاساپ حابارلادى.

«مينيسترلىك بيىل قاسيەتتى كىتاپتىڭ ەكى ميلليونعا تارتا كوشىرمەسىن تاراتادى»، - دەپ حابارلادى ەسكەرتكىش سىيلىقتار بەرۋ كوميتەتىنىڭ باسشىسى شەيح ءتالال بەن احمەد ءال-اكيل.

ونىڭ ايتۋىنشا، قۇراننىڭ كوشىرمەسى جيددا ماڭىنداعى كورول ابدەل ازيز اتىنداعى حالىقارالىق اۋەجايدا، وسى قالانىڭ تەڭىز گاۆانىندا، سونداي-اق ەلدىڭ ءبىرقاتار اۋداندارىنداعى قۇرلىقتاعى بىرنەشە شەكارا وتكەلىندە تاراتىلادى.

جالپى العاندا كورولدىكتىڭ بارلىق اۋماعىندا 50 سىيلىق بەرۋ پۋنكتتەرى ۇيىمداستىرىلعان. ونىمەن 1 مىڭنان اسا ادام اينالىسادى. ولاردىڭ ماقساتى قاجىلىعىن وتەپ، ەلدەن كەتىپ بارا جاتقان بىردە-ءبىر زيارات ەتۋشى سىيلىقسىز قالماۋىن باقىلاۋ.

ءدىني ۆەدومستۆونىڭ مالىمدەمەسىنە سايكەس قۇران 13 تىلگە اۋدارىلعان، ماتىندەرگە تۇسىنىكتەر بەرىلگەن.

بيىلعى جىلى يسلامنىڭ قاسيەتتى ورىندارىنا قاجىلىق كەزىندە ەكى قايعىلى وقيعا ورنى الدى. 11- قىركۇيەكتە مەككەدە ءال-حارام مەشىتىندە مۇنارالى كران قۇلاپ، 111 ادام قازا بولدى، ال 24 قىركۇيەكتە مينا جازىعىندا كەپتەلىس سالدارىنان ءارتۇرلى ەلدەن 769 زيارات ەتۋشى قۇربان بولدى، تاعى 934 ءى زارداپ شەكتى.