جاڭا ەڭبەك كودەكسى جۇمىسشىلاردى قىسقارتۋدىڭ 2 جاعدايىن كوزدەيدى - ت. دۇيسەنوۆا
بۇل تۋرالى بۇگىن ماجىلىستە جاڭا ەڭبەك كودەكسىن تانىستىرا وتىرىپ، دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا ءمالىم ەتتى.
«قازىرگى زاڭناما بويىنشا جۇمىسشىلاردى قىسقارتۋدىڭ ءبىر نورماسى بار، ءبىراق ول نورما كاسىپورىن قايتا قۇرىلسا، كاسىپورىننىڭ جۇمىسى قۇلدىراسا نەمەسە كەرىسىنشە جاقسارسا، قولدانىلمايتىن نورما. سوندىقتان، ءبىز جاڭا كودەكسكە ساي جۇمىسشىنى قىسقارتۋدىڭ ەكى جاعدايىن انىقتادىق»، - دەپ ءتۇسىندىردى ت. دۇيسەنوۆا.
ءمينيستردىڭ ايتۋىنشا، جاڭا رەداكسيالانعان كودەكس نورماسىنا ساي، ەندى جۇمىس بەرۋشى ءوز كاسىپورىنى جابىلىپ نەمەسە قايتا قۇرىلعان جاعدايدا جانە كاسىپورنىنداعى ونىمدىلىك كولەمى ازايىپ، ەكونوميكالىق شىعىنعا ۇشىراسا جۇمىسشىلارىن قىسقارتا الادى.
«ەگەر جۇمىسشى بىرىنشى جاعداي اياسىندا قىسقارۋعا ۇشىراسا جۇمىس بەرۋشى ونى الدىن الا ەسكەرتىپ، 1 ايلىق جالاقى كولەمىندە وتەماقى تولەيدى. ەكىنشى جاعدايدا جۇمىس بەرۋشى 15 كۇن بۇرىن قاعاز جۇزىندە ەسكەرتۋ تاراتىپ، وعان 2 ايلىق جالاقى مولشەرىندە وتەماقى تولەۋى كەرەك»، - دەپ ءتۇسىندىردى ول.
اۆتور: كەنجەكەي توقتامۇرات قىزى