ەلوردادا ءوتىپ جاتقان 2- حالىقارالىق يلليۋزيا جانە سيقىر فەستيۆالى بۇگىن قورىتىندىلانادى - فوتو
فەستيۆال بىلتىر ءبىرىنشى رەت وتكەن. بيىل دا Magic Astana فەستيۆالىنە الەمنىڭ ۇزدىك سيقىرشىلارى جينالدى، دەپ حابارلايدى استانا اكىمدىگىنىڭ رەسمي سايتى.
فەستيۆالدىڭ ءبىرىنشى كۇنى بەيبىتشىلىك جانە كەلىسىم سارايىنا جينالعان قاۋىم ادام سەنگىسىز تاڭعاجايىپ شوۋ تاماشالادى.
سيقىرشىلاردىڭ ايتۋىنشا، قويىلىمدار جان- جاقتى. استانالىق كورەرمەندەردى وڭتۇستىك كورەيادان كەلگەن قوناق An Ha Lim ءتانتى ەتتى. 24- دۇنيەجۇزىلىك سيقىر چەمپيوناتىنىڭ كۇمىس جۇلدەگەرى الەمدە ەشكىم قايتالاي المايتىن كارتالارمەن جاسالاتىن مانيپۋلياتسيانى كوپشىلىك نازارىنا ۇسىندى.
سونداي- اق، فەستيۆالعا جاپونيادان كەلگەن قوناق Jinpei Washiro دا قاتىستى. ول ارنايى كەنەپكە جارقىرايتىن بوياۋ مەن ازداعان جارىقتىڭ كومەگىمەن سۋرەت سالدى.
بۇدان باسقا، «بريتانيا دارىنداردى ىزدەيدى» شوۋىنىڭ فيناليستى رەسەيلىك «يۋدي» بي ۇجىمى دا ءوز ونەرىن ورتاعا سالدى. 2007 - جىلى اتالعان توپ ءبىرىنشى ارنادا «مينۋتا سلاۆى» شوۋىنىڭ جەڭىمپازى اتانعان بولاتىن. Magic Astana 2015 سيقىر فەستيۆالى قازاقستاندا وتەتىن بىرەگەي شوۋ بولىپ تابىلادى.
سيقىر مەن يلليۋزيانىڭ Magic Astana 2015 2- حالىقارالىق فەستيۆالى بۇگىن، 6 - شىلدە - استانا كۇنى، بەيبىتشىلىك جانە كەلىسىم سارايىندا ساعات 19:00 قورىتىندىلانادى.
