الماتى اۋرۋحانالارىندا قوردايدا جاپا شەككەن 29 ادام جاتىر
بۇل تۋرالى بۇگىن بولعان بريفينگ بارىسىندا ق ر دەنساۋلىق ساقتاۋ ۆيتسە- ءمينيسترى كامالجان نادىروۆ ايتتى، دەپ حابارلايدى قازاقپارات ءتىلشىسى.
بۇگىن ۆيتسە- مينيستر اۋرۋحانالاردى ارالاپ، جاپا شەككەندەردىڭ جاعدايىن ءبىلدى.
«قازىرگى ۋاقىتتا 25 ادامنىڭ جاعدايى ورتاشا دەپ باعالانىپ وتىر. 2 پاتسيەنتتىڭ جاعدايى اۋىر بولسا، ورتالىق كلينيكالىق اۋرۋحانا مەن №7 اۋرۋحانادا جاتقان 2 پاتسيەنتتىڭ جاعدايى اسا اۋىر. بۇلار جانساقتاۋ بولىمىندە جاتىر. جامبىل وبلىسىندا 12 پاتسيەنت اۋرۋحانادا، بىرەۋى ادام جانساقتاۋ بولىمىندە جاتىر»، - دەدى كامالجان نادىروۆ.
ونىڭ ايتۋىنشا، قاقتىعىستا جاپا شەككەندەردىڭ جاسى 17 مەن 77 جاس ارالىعىندا. ولاردىڭ بارلىعىنا مەملەكەتتىك تەگىن مەدتسينالىق كومەك كولەمى اياسىندا قىزمەت كورسەتىلىپ جاتىر.
بىرنەشە كۇن ىشىندە الماتى دارىگەرلەرى 14 وتا جاساعان.
جامبىل وبلىسىنان پاتسيەنتتەر ساناۆياتسيا ارقىلى جەتكىزىلدى.
قالالىق قوعامدىق دەنساۋلىقتى ساقتاۋ باسقارماسى باسشىسىنىڭ مىندەتىن اتقارۋشى تىلەۋحان ابىلدايەۆتىڭ سوزىنە قاراعاندا، 13 جەدەل جاردەم بريگاداسى جۇمىلدىرىلعان.
سونىمەن قاتار، قوردايدا جاتقان ناۋقاستاردى ەمدەۋگە الماتىدان 5 رەانيماتولوگ، 1 تراۆماتولوگ، 2 نەيروحيرۋرگ، 1 تامىر حيرۋرگى جىبەرىلدى.
دەنساۋلىق ساقتاۋ ۆيتسە- ءمينيسترى ءلاززات اقتايەۆانىڭ ايتۋىنشا، قوردايداعى كەلەڭسىز جاعداي سالدارىنان 182 ادام مەديتسينا قىزمەتكەرلەردىڭ كومەگىنە جۇگىنگەن.
10 ادام كوز جۇمسا، 8 ادام اسا اۋىر حالدە جاتىر.
ەسكە سالايىق، 7 - اقپان كۇنى جامبىل وبلىسىنىڭ قورداي اۋدانىنداعى ماسانچي اۋىلىنىڭ تۇرعىندارى اراسىندا جاپپاي توبەلەس بولدى.
ق ر پرەزيدەنتى قاسىم- جومارت توقايەۆ بۇزاقىلىق سيپاتتاعى جاپپاي توبەلەستى ارانداتۋشىلار ءوز پايداسىنا قولدانباق بولعانىن مالىمدەدى.
سونداي- اق ۆيتسە- پرەمەر بەردىبەك ساپاربايەۆتىڭ توراعالىعىمەن ۇكىمەتتىك كوميسسيا قۇرىلاتىنىن، قازا بولعانداردى جەرلەۋ، زارداپ شەككەندەرگە كومەكتەسۋ جۇمىستارى ۇيىمداستىرىلاتىنىن، قوعامدىق ءتارتىپتى بۇزعاندار انىقتالىپ، قاتاڭ جاۋاپقا تارتىلاتىنىن ءمالىم ەتتى. باس پروكۋراتۋراعا، ۇلتتىق قاۋىپسىزدىك كوميتەتىنە ءتيىستى تاپسىرما بەرىلدى.
بارلىعى قورداي اۋدانىنداعى وقيعا بايلانىستى 25-تەن استام قىلمىستىق ءىس قوزعالدى. بۇل تۋرالى ىشكى ىستەر مينيسترلىگى تەرگەۋ دەپارتامەنتىنىڭ باستىعى سانجار ءادىلوۆ ءمالىم ەتكەن ەدى.
اۆتور: گۇلميرا عوسمانالي
