28 - مامىر. قازاقپارات كۇنتىزبەسى
اتاۋلى كۇندەر
حالىقارالىق ايەلدەر دەنساۋلىعى ءۇشىن ءىس- ارەكەت كۇنى
1987 -جىلدان بەرى جىل سايىن تويلانادى. ماقساتى - الەم ەلدەرىنىڭ ۇكىمەتتەرىنە كەز كەلگەن ۇلتتىڭ بولاشاعى ءۇشىن ايەل دەنساۋلىعىنىڭ ماڭىزى زور ەكەنىن ەسكە سالۋ.
ازەربايجاندا رەسپۋبليكا كۇنى
ۇلتتىق مەرەكە 1918 -جىلى ازەربايجان دەموكراتيالىق رەسپۋبليكاسى (ءا د ر) تاۋەلسىز مەملەكەت دەپ جاريالانۋىنا وراي بەكىتىلدى. ءا د ر تاۋەلسىزدىگىن 1918 -جىلدىڭ 28 - مامىرىندا زاكاۆكازە مۇسىلماندارىنىڭ ۇلتتىق ۋاقىتشا كەڭەسى جاريالادى. سول كۇنى تبيليسيدەگى كاۆكاز گۋبەرناتورىنىڭ بۇرىنعى سارايىنىڭ زالىندا تاۋەلسىزدىك تۋرالى دەكلاراتسياعا قول قويىلدى. ازەربايجانداعى رەسپۋبليكا كۇنى 1992 -جىلى بەكىتىلدى.
ارمەنيادا رەسپۋبليكا كۇنى
مەرەكە 1918 -جىلى زاكاۆكازە رەسپۋبليكاسىنىڭ ىدىراۋىنان كەيىن ارمەنيا رەسپۋبليكاسىنىڭ جاريالانۋىنا بايلانىستى بەكىتىلدى. ارمەنيانىڭ بارلىق اۋماعىندا دەمالىس كۇنى. اتالعان كۇننىڭ ەكىنشى اتاۋى - ەگەمەندىكتى قالپىنا كەلتىرۋ كۇنى. 1918 -جىلدىڭ 28 -مامىرىندا التى عاسىردان استام ۋاقىت بويى شەتەلدىك باسقىنشىلاردىڭ قول استىندا بولعان ارمەنيانىڭ تاۋەلسىزدىگى قالپىنا كەلتىرىلدى.
ەستە قالار وقيعالار
1993 -جىلى قازاقستان رەسپۋبليكاسى پرەزيدەنتى نۇرسۇلتان نازاربايەۆتىڭ «ورداباسى ۇلتتىق تاريحي- مادەني جانە تابيعي قورىعىن قۇرۋ تۋرالى» قاۋلىسى شىقتى.
1998 -جىلى ق ر پرەزيدەنتى نۇرسۇلتان نازاربايەۆ پەن LG Electronics بىرلەستىگىنىڭ باسشىسى دجون كۋ سالتاناتتى جاعدايدا «LG Electronics Almaty Kazakhstan» زاۋىتىن اشتى.
2005 -جىلى الماتىدا جەڭىستىڭ 60 جىلدىعىنا وراي «راقىمجان قوشقاربايەۆ. رەيحستاگقا شابۋىل» دەرەكتى فيلمىنىڭ تانىستىرىلىمى بولدى. رەجيسسەرى - ءادىل مەدەتبايەۆ. 40 مينۋتتىق فيلم حالىقارالىق مادەني قۇندىلىقتاردى ساقتايتىن جانە قولداۋ كورسەتەتىن قوردىڭ كومەگىمەن «Amanat studio» ستۋدياسىندا تۇسىرىلگەن.
2009 -جىلى رۋمىنيانىڭ ياسى ۋەزىندەگى سترۋنگا كوممۋناسىنىڭ براتۋلەشت اۋىلىندا 1944 -جىلى ەكىنشى دۇنيەجۇزىلىك سوعىستا قازا بولعان قازاقستاندىق جاۋىنگەر شەرنياز اياعانوۆقا ارنالعان ەسكەرتكىشتىڭ اشىلۋ ءراسىمى ءوتتى. قاتارداعى جاۋىنگەر شەرنياز اياعانوۆ قاراعاندى وبلىسىنىڭ قارقارالى اۋدانىندا دۇنيەگە كەلگەن، سوعىسقا سەمەي وبلىسىنىڭ اياگوز اسكەري كوميسسارياتىنان شاقىرىلعان. موتواتقىشتار باتالونىنىڭ 56- بريگاداسىنىڭ 23- تانك كورپۋسىنىڭ قۇرامىندا بولدى. بۇل شارا قازاقستان رەسپۋبليكاسىنىڭ ديپلوماتيالىق ميسسياسى مەن رۋمىنيانىڭ باتىرلاردى ەسكە الۋ ۇلتتىق اگەنتتىگىنىڭ جانە «رومپەترول» سەرىكتەستىك توبىنىڭ بىرلەسكەن كومەگىمەن ۇيىمداستىرىلدى.
2017 -جىلى ق ح ر- دا شىعاتىن «ىلە» گازەتىندە جارقىن ءنۇرابىلدا ۇلىنىڭ ماقالاسى جاريالاندى. ماقالادا ۇشاق ساتىپ الىپ، ونى سوعىس جىلدارىندا قازاقتارعا كومەكتەسۋگە جىبەرگەن بەلگىلى قازاق بايى باسبايدىڭ قۇرمەتىنە اشىلعان مۇراجاي كەشەنى تۋرالى ايتىلعان.
2018 -جىلى زەرەندى اۋدانىنداعى (ءۋالي حان كەسەنەسىنىڭ سولتۇستىك- باتىس بولىگىنەن 10 ك م قاشىقتىقتا ورنالاسقان) ەگىستىك القابىنان اراب جازۋلارى بار ەكى ەسكەرتكىش گرانيت تاستارى تابىلدى. قازبالار XVIII عاسىردىڭ باسى مەن ⅩⅨعاسىردىڭ اياعىنا تيەسىلى بولۋى ىقتيمال. سونداي- اق، قۇلپىتاستاردىڭ ءبىرى - قاجىنىكى، ەكىنشىسى - ابىلاي حان نوكەرلەرىنىڭ ءبىرىنىڭ قۇلپىتاسى بولۋى مۇمكىن دەگەن جورامال بار.
2018 -جىلى ۆەتنامدىق حوشيمين قالاسىندا وتكەن تاەكۆوندودان ازيا چەمپيوناتىندا دۇيسەباي سمايىل 87 كەلىگە دەيىنگى سالماق دارەجەسىندە التىن مەدال جەڭىپ الدى. قازاقستاندىق سپورتشىنىڭ بۇل جەڭىسى 2006 -جىلدان بەرى قازاقستان قورجىنىنا تۇسكەن ازيا چەمپيوناتتارىنداعى ءبىرىنشى التىن بولدى.
2019 -جىلى قىزىلوردا وبلىسى سىرداريا اۋدانى اۋماعىنا ورىن تەپكەن كونە قىشقالا شاھارىندا زەرتتەۋشىلەر جاڭا دەرەكتەرگە قول جەتكىزدى. بۇل قالا الپامىس باتىردىڭ جارى - گۇلبارشىن ءومىر سۇرگەن بارشىنكەنت بولۋى ابدەن مۇمكىن. ارحەولوگتاردىڭ ايتۋىنشا، اتالمىش قالاشىقتى زەرتتەۋ سىر بويىنداعى ورتا عاسىرلىق قالالاردى زەرتتەۋ مەن تاريحىن انىقتاۋدا ءوز سەپتىگىن تيگىزەتىن بولادى. قىشقالانىڭ شىن اتاۋى ءالى كۇنگە دەيىن بەلگىسىز. ەل اراسىندا ونى بارشىنكەنت دەيتىن بولجامدار ايتىلادى.
2019 -جىلى العاش رەت قازاقستاندا «بولجام. قورعانىس. الدىن الۋ (Predict, Protect, Prevent) « تاقىرىبىندا ق ر قورعانىس مينيسترلىگى بىرىككەن ۇلتتار ۇيىمىنىڭ حاتشىلىعىمەن بىرلەسە ۇيىمداستىرىلعان بىتىمگەرشىلىك تەحنولوگيالارداعى سەرىكتەستىك بويىنشا ب ۇ ۇ- نىڭ بەسىنشى سيمپوزيۋمى ءوتتى. ءىس- شارا ب ۇ ۇ- نىڭ بىتىمگەرشىلىك قىزمەتىن ودان ءارى جەتىلدىرۋ اياسىندا وزەكتى ماسەلەلەردى قاراستىرۋ ءۇشىن ءتيىمدى الاڭ بولدى. بۇل تۇرعىدا قازاقستان رەسپۋبليكاسى بەيبىتشىلىك پەن قاۋىپسىزدىكتى قامتاماسىز ەتۋ اياسىندا اناعۇرلىم قاۋىپسىز جانە ءتيىمدى قىزمەتكە ىقپال ەتەتىن تەحنولوگيالىق تەتىكتەر مەن تىڭ جاڭالىقتار بويىنشا ءبىرقاتار ۇسىنىستار ەنگىزدى.
