موتورلى قايىق اۋدارىلىپ، 28 ادام ءىز-ءتۇسسىز جوعالدى

استانا. قازاقپارات - ءۇندىستاندا براحماپۋترا وزەنىمەن ءجۇزىپ كەلە جاتقان موتورلى قايىق ەلدى ءۇندىستاننىڭ شىعىسىنداعى اسسام شتاتىندا توڭكەرىلگەننەن كەيىن 28 ادام ءىز-ءتۇسسىز جوعالىپ كەتتى، دەپ حابارلايدى قازاقپارات Shillong Times گازەتىنە سىلتەمە جاساپ.

باسىلىمنىڭ مالىمەتىنشە، وقيعاعا قايىقتا ادامداردىڭ شامادان تىس كوپ بولعانى سەبەپ بولۋى مۇمكىن. 22 ورىندىق قايىق 40 ادامدى جەتكىزبەكشى بولعان.

جەرگىلىكتى بيلىك وكىلدەرىنىڭ ايتۋىنشا، 12 جولاۋشى قاتتى اعىنعا قاراماستان، ءوز بەتتەرىمەن جاعاعا شىققان. ەكى ادام سۋعا كەتتى.

قالعان جولاۋشىلار جايلى اقپارات جوق. بيلىك وكىلدەرى ءىز-ءتۇسسىز جوعالعان ازاماتتاردى ىزدەستىرىپ جاتىر.