قازاقستاندا جۇكتى ايەلدەردىڭ 27 پايىزى نەمەن اۋىراتىنى ايتىلدى

نۇر-سۇلتان. قازاقپارات - قازاقستانداعى جۇكتى ايەلدەردىڭ تورتتەن بىرىنەن استامى تەمىر تاپشىلىعىنان زارداپ شەگەدى، دەپ حابارلايدى قازاقپارات.

اعزاداعى تەمىر تاپشىلىعى نەمەسە تەمىر تاپشىلىعى انەمياسى (ت ت ا) - اعزاداعى تەمىر دەڭگەيىنىڭ تومەندەۋىمەن سيپاتتالاتىن، قانداعى ەريتروتسيتتەر مەن گەموگلوبين كونسەنتراتسياسىنىڭ تومەندەۋىنە اكەلەتىن پاتولوگيالىق جاعداي.

دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا الەمدە 2 ميللياردتان استام ادام تەمىر تاپشىلىعىنان زارداپ شەگەدى. ەڭ ءجيى كەزدەسەتىن سەبەپتەر - تەڭگەرىمسىز تاماقتانۋ، تەمىردى ءسىڭىرۋ قابىلەتىنىڭ تومەندەۋى جانە تۇراقتى قان جوعالتۋ. نەگىزگى تاۋەكەل توبىندا ۆەگەتاريانشىلار، قاتاڭ ديەتاداعى ادامدار، سونداي-اق قارت كىسىلەر تۇر. ولاردا ىشەكتىڭ تەمىردى ءسىڭىرۋ قابىلەتى تومەن كەلەدى. تەمىر تاپشىلىعى انەمياسى دياگنوزى كوبىنەسە بالالارعا، جاسوسپىرىمدەرگە جانە جۇكتى ايەلدەرگە قويىلادى، ويتكەنى ولاردىڭ كۇندەلىكتى تەمىرگە دەگەن قاجەتتىلىگى جالپى حالىققا قاراعاندا جوعارى. قازاقستاندا جۇكتى ايەلدەردىڭ %27 دا تەمىر تاپشىلىعى بايقالادى. بۇل مالىمەتتەردى دەنساۋلىق ساقتاۋ مينيسترلىگى 2020 -جىل بويىنشا جاريالاعان.

ايتا كەتۋ كەرەك، اۋىتقۋلارعا قاراماستان، ورتاشا العاندا بۇل ۇلەس ۋاقىت وتە كەلە تومەندەيدى. مىسالى، 2007-2011 -جىلدار ارالىعىندا انەميا دياگنوزى قويىلعان جۇكتى ايەلدەردىڭ ۇلەسى 37,8-دەن %41,7 عا دەيىن بولدى.

رەداكتور جانات قاپالبايەۆا