27-مامىر. قازاقپارات كۇنتىزبەسى
ەستە قالار وقيعالار
1992 -جىلى جامبىل وبلىسى شۋ اۋدانىنىڭ بالۋان شولاق اتىنداعى اۋىلىندا بالۋان، اقىن، كومپوزيتور بالۋان شولاققا ەسكەرتكىش ورناتىلدى.
1999 -جىلى قازاقستان رەسپۋبليكاسىنىڭ پرەزيدەنتى ن. ءا. نازاربايەۆ «قازاقستان رەسپۋبليكاسى مەن وزبەكستان رەسپۋبليكاسى اراسىنداعى ماڭگىلىك دوستىق جونىندەگى شارتتى راتيفيكاتسيالاۋ تۋرالى» قازاقستان رەسپۋبليكاسىنىڭ زاڭىنا قول قويدى.
2009 -جىلى ساياسي قۋعىن- سۇرگىن قۇرباندارىن ەسكە الۋ كۇنىنە وراي جازۋشى قايىم مۇحامەدحانوۆتىڭ «تاعدىر جانە كارلاگ» اتتى تۋىندىسى وقىرماندار نازارىنا ۇسىنىلدى. شارا «قايىم مۇحامەدحانوۆ اتىنداعى ءبىلىم جانە مادەنيەت ورتالىعى» باستاماسىمەن جانە قازاقستان- بريتان تەحنيكالىق ۋنيۆەرسيتەتتىڭ قولداۋىمەن وتكىزىلدى.
قايىم مۇحامەدحانوۆ (1916-2004) - مۇحتار اۋەزوۆتىڭ عىلىمي تۇجىرىمدامالارىنىڭ شاكىرتى جانە سەنىمدى جالعاستىرۋشىسى، ءوز ءومىرىن اباي ونەرىن زەرتتەۋگە ارناعان، ۇلى ويشىلدىڭ اقىندىق مەكتەبىن وقۋدى تەرەڭدەتكەن. ول قاتال كەزەڭدەردە دە ۇلتتىق مادەنيەت وكىلدەرى - شاكارىم قۇدايبەردى ۇلىنىڭ، احمەت بايتۇرسىنوۆتىڭ، ءمىرجاقىپ دۋلاتوۆتىڭ، ماعجان جۇمابايەۆتىڭ، جۇسىپبەك ايماۋىتوۆتاردىڭ ونەرلەرىن باتىل ناسيحاتتاعان.
2009 -جىلى قاراعاندى وبلىسىنداعى 500 ك ۆ- تىق «اعادىر» قوسالقى ستانساسىندا «اعادىر- وقماەس» ۋچاسكەسى ىسكە قوسىلدى.
2012 -جىلى ايگىلى كارىس رەجيسسەرى چو سو ري استاناعا بۇكىل الەمگە تانىمال «اريران» مۋزىكالىق لازەرلىك شوۋىن الىپ كەلدى. گيننەستىڭ رەكوردتار كىتابىنا ەنگەن شوۋ «قازاقستان» ورتالىق كونسەرت زالىندا ق ر مەن وڭتۇستىك كورەيا اراسىنداعى ديپلوماتيالىق قاتىناستىڭ 20 جىلدىعىنا وراي وتكىزىلدى. ءبىر جارىم ساعاتتىق سپەكتاكلدىڭ نەگىزىنە «تاڭعى جۇپار ەلىنىڭ» فيلوسوفيالىق تاريحى الىنعان. وندا كارىس حالقى ونەرىنىڭ تاڭعاجايىپ تۇرلەرى ۇيلەسىم تاپقان.
تاەكۆوندو جاۋىنگەرلىك ونەردىڭ ۇلگىلىك كورسەتىلىمدەرىن ۇلتتىق داۋىلپاز اسپاپتارداعى اۋەن اۋىستىردى. ودان كەيىن كورەيانىڭ قازىرگى زامانعى روك- مۋزىكاسى قۇلاق قۇرىشىن قاندىرعان سوڭ جەلپۋىشتەرى بار اسەرلى ءداستۇرلى كارىس بيىنە جول بەردى. سونان سوڭ «B- Boy» ايگىلى برەيك- دانس جاستار توبى ەلوردا جۇرتىنىڭ الدىندا ونەرلەرىن پاش ەتتى.
2016 -جىلى قوستانايدا سالتاناتتى تۇردە قوبىلاندى باتىر مونۋمەنتى اشىلدى. ەسكەرتكىشتى قوستانايعا اتى اڭىزعا اينالعان باتىردىڭ ۇرپاقتارى قويدىردى. ونى ق ر سۋرەتشىلەر وداعىنىڭ مۇشەلەرى احمەتوۆتار جاسادى.
2016 -جىلى National Geographic قوعامداستىعىنىڭ مۇشەلەرى 1954 -جىلعى جۋرنالدىڭ مۇقاباسىندا سۋرەتى جاريالانعان فازيلا جانالتايدى ىزدەپ تاپتى. استانانىڭ 80 جاستاعى تۇرعىنى وسى باسىلىمنىڭ قازاقستاندىق نۇسقاسىنىڭ تۇساۋكەسەرىنە شاقىرىلدى. جۋرنالدىڭ 1954 -جىلعى سول نومىرىندە التايدان تۇركياعا كوشۋ كەزىندەگى بوسقىنداردىڭ ءومىرى، سونداي- اق قازاق حالقىنىڭ ادەت- عۇرپى مەن سالت- ءداستۇرى تۋرالى جازىلعان. فازيلا جانالتاي - ءتىرى قالعان بوسقىنداردىڭ ءبىرى. ف. جانالتايدىڭ ايتۋىنشا، امەريكالىق فوتوگرافتىڭ تۇسىرگەن سۋرەتىندە ول نەبارى 16-17 جاستا.
2018 -جىلى چۋۆاش رەسپۋبليكاسىنىڭ ۇلتتىق كىتاپحاناسىندا قازاق ادەبيەتى جانە مادەنيەتى ورتالىعى اشىلدى. قوناقتارعا ءۇش تىلدە - قازاق، ورىس جانە اعىلشىن تىلدەرىندەگى ونەر سالاسىنداعى، تاريحي، عىلىمي جانە كوركەم ادەبيەت تۋىندىلارى ۇسىنىلادى.
2019 -جىلى قوستانايدا جاستار سارايىنىڭ جانىندا العاشقى مەحانيزاتور- ايەل، سوتسياليستىك ەڭبەك ەرى كامشات دونەنبايەۆانىڭ ءمۇسىنى سالتاناتتى تۇردە اشىلدى. ونىڭ قۇرمەتىنە كىتاپ باسىپ شىعارىلدى، دەرەكتى فيلم ءتۇسىرىلدى، مەڭدىقارا اۋدانى بوروۆسكوە اۋىلىندا جەرگىلىكتى كوللەدجگە ك. دونەنبايەۆانىڭ ەسىمى بەرىلدى.
2020 -جىلى جاڭا ەكونوميكالىق شىنايىلىق جاعدايىنداعى ەكونوميكالىق ءوسۋدى قالپىنا كەلتىرۋ بويىنشا ۇسىنىستاردى ازىرلەۋ ماقساتىندا قازاقستان رەسپۋبليكاسى پرەزيدەنتىنىڭ جانىنداعى ەكونوميكالىق ءوسۋدى قالپىنا كەلتىرۋ جونىندەگى مەملەكەتتىك كوميسسيا قۇرىلدى.
2020 -جىلى «Academic Ranking of World Universities-European Standard» (ARES) بەدەلدى ەۋروپالىق رەيتينگ زەرتتەۋلەرى بويىنشا ءال- فارابي اتىنداعى قازاق ۇلتتىق ۋنيۆەرسيتەتى «اا+» جوعارى باعاسىنا يە بولىپ، جەتەكشى ەۋروپا ۋنيۆەرسيتەتتەرىنىڭ قاتارىنا كىردى. رەيتينگىگە ەۋروپالىق ستاندارتتارعا قىزمەتى ساي كەلەتىن ت م د ەلدەرىنىڭ 530 دان استام جوعارى وقۋ ورنى قاتىستى.
