الەم ادەبيەتىنىڭ 27 جاستاعى جاڭا جۇلدىزى

 استانا. قازاقپارات - Vogue, Esquire, The Guardian سىندى الەمنىڭ بەتكە ۇستار باسىلىمدارى يرلانديالىق ساللي ءرۋنيدى ادەبيەت الەمىنىڭ جاڭا جۇلدىزىنا بالايدى.

 ونىڭ دەبيۋتتىك رومانى بىلتىر ناعىز بەستسەللەرگە اينالدى. ال، جاڭا تۋىندىسى ەكرانيزاتسيالانعالى جاتىر. ساللي رۋني ادەبيەت الەمىنە 25 جاسىندا كەلگەن. ول كەزدە ترينيتي- كوللەدجىن ەندى اياقتاعان بولاتىن. جاس پروزايكتىڭ «دوستارمەن اڭگىمە» اتالاتىن رومانىن بەلگىلى ءبىر باسىلىم ءباسساۋدادان ساتىپ الىپ، جاريالاپ وتىرعان. تۋىندى كىتاپ رەتىندە وتكەن جىلدىڭ مامىر ايىندا باسىلىپ شىقتى. زاماناۋي پروزانى قالدىرماي وقيتىنداردىڭ ءبارى ءسالليدىڭ رومانىنىڭ مۇقاباسىن كەزەك- كەزەك ءوز ينستاگرام- اككاۋنتتارىنا سالدى. ساللي «قاراپايىم ادامدار» تۋىندىسى ءۇشىن ادەبي ماراپاتتار قاتارىندا كوش باستايتىن Man Booker Prize پرەمياسىنا ۇسىنىلدى. وتكەن اپتادا ونىڭ جەلىسى بويىنشا BBC ارناسى سەريال تۇسىرەتىنى بەلگىلى بولدى. 27 جاستاعى قالامگەردىڭ اتاعى گەومەتريالىق پروگرەسسيامەن ءوسىپ كەلەدى. سونىمەن، ساللي نە تۋرالى جازادى؟

ونىڭ العاشقى رومانى فرەنسيس ەسىمدى ستۋدەنت قىزدىڭ باسىنان وتكەن ماحاببات وقيعالارىنا ارنالعان. ءسالليدىڭ كىتاپتارى سەزىم، دوستىق، جەتىستىك، قىزعانىش سىندى كۇندەلىكتى كەشەتىن كۇي، تۇرمىستىق ماسەلەلەردى قوزعايدى. وقىعان ادامدار اۆتور روماندارىنىڭ كادىمگى WhatsApp نەمەسە Facebook سىندى الەۋمەتتىك جەلىدەگى حات الماسۋعا ۇقسايتىنىن ايتادى. ساللي رۋني شىعارماشىلىعىنا «30 جاستاعىلار تۋرالى 30 جاستاعىلارعا ارناپ جازاتىن 30 جاستاعى جازۋشى» دەگەن انىقتاما دا بەرىلەدى. «قاراپايىم ادامدار» سيۋجەتتىك جەلىسى بويىنشا ءبىرىنشى رومانعا ۇقساس. وقيعا دۋبلين قالاسىندا ورىن الادى. تۋىندىنى زاماناۋي پروزا دەۋگە دە كەلمەيتىن شىعار، سەبەبى، وندا ايتىلاتىن اڭگىمە «كلاسسيكالىق ماحاببات وقيعاسىن» ەسكە سالادى. مىسالى، ءبىر- بىرىنە عاشىق مارياننا مەن كوننەلل العاش رەت جوعارى سىنىپتاردا كەزدەسە باستايدى. كەيىن ستۋدەنت شاعىندا سەزىم شارىقتاۋ شەگىنە جەتىپ، بىرنەشە جىلدان سوڭ شىتىناپ، سىنادى. روماندى قاي زامانعا دا شاقتاۋعا بولادى دەگەن سەبەبىم، مۇندا الەۋمەتتىك تەڭسىزدىك ماسەلەسى انىق قوزعالادى.

 جىگىتتىڭ شەشەسى قىزدىڭ اتا- اتاسى تۇراتىن اق ۆيللادا قىزمەتشى بولىپ جۇمىس ىستەيدى. ءرۋنيدىڭ اۆتور رەتىندە مىقتىلىعى ونىڭ اسا بايقامپازدىعى مەن سەزىمتالدىعىندا جانە وتكىر ديالوگتارىندا. ءبىراق، بۇل دا وزگە جازۋشىلار سەكىلدى رومان اۆتوبيوگرافيالىق ەمەس دەگەندى العا باسادى. «ءومىرىم رومان جازاتىنداي قىزىقتى ەمەس»، - دەيدى قالامگەر.

 ساللي ءرۋنيدىڭ تۋىپ- وسكەن جەرى مايو گرافستۆوسىنداعى شاعىن كاسلبار قالاشىعى ەكەن. ونىڭ اتا- اناسى - ادەبيەت دەسە، «ىشكەن اسىن جەرگە قوياتىن» ءسوز ونەرىنە جاقىن ادامدار. اناسى جەرگىلىكتى مادەنيەت ورتالىعىن باسقارعان. مۇنداي ورتادا تاربيەلەنگەن قىزدىڭ ونەر مەن ادەبيەتتەن وزگەنى تاڭداۋى مۇمكىن ەمەس ەدى. ءبىراق، ولار ەشقاشان بالالارىنا وسى باعىتتا ءجۇرۋدى مىندەتتەمەگەن. اتا- انا ءۇشىن ولاردىڭ جۇرەك قالاۋى قاشاندا ماڭىزدى بولدى. قازىرگى تاڭدا رۋني يرلانديادا بۇكىلالەمدىك اتاعىنا قاراماي، قاراپايىم ءومىر ءسۇرىپ جاتىر. امەريكالىق Vogue جۋرنالىندا ءوز كولونكاسى بار. 

Massaget.kz