جامبىل وبلىسىندا 27 جاستاعى جىگىت ءبۇلدىرشىن كەيپىندە قالىپ وسپەي قالعان - فوتو
داۋىسى دا كىشكەنتاي بالانىكىنە ۇقسايدى. ال سالماعى 28 كەلىدەن اسپاعان دەپ جازادى.
بۇل تۋرالى زامانا گازەتى حابارلايدى.
قوجامقۇل جامبىل وبلىسىنىڭ تۋماسى، سارىسۋ اۋدانىنا قاراستى شاعالا اۋىلىندا تۋىلعان ەكەن. سول اۋىلداعى «شاعالا» ورتا مەكتەبىن 9-سىنىپقا دەيىن وقىپتى. كەيىننەن بايزاق اۋدانىنداعى بۋرىل اۋىلىنا قونىس اۋدارىپتى. ءبىراق مەكتەپتى سول كۇيى بىتىرە الماعان. وقۋىن كوللەدجدە جالعاستىرماق بولعان ەكەن، وعان دەنساۋلىعى مۇمكىندىك بەرمەپتى.
«بالا كۇنىمدە باسىم ءجيى اۋىراتىن. ءبىراق ول كەزدەرى بۇعان ءوزىم دە، ۇيدەگىلەر دە اسا ءمان بەرمەيتىنبىز. «سۋىقتاعان شىعارسىڭ»، «تىنىعىپ ال، قويىپ قالادى» دەپ وزىمىزگە دياگنوز قويىپ جۇرە بەرەتىنبىز. 8-9-سىنىپقا دەيىن ساباقتى جاقسى وقيتىنمىن. كەيىننەن باسىم شىداتپاي اۋىرىپ، ساباق وقۋعا كەدەرگى كەلتىرىپ، ۇلگەرىمىمدى ناشارلاتىپ الدىم»، - دەيدى قوجامقۇل.
جىگىت ناۋقاس ەكەنىن 9- سىنىپتى ءبىتىرىپ، كوللەدجگە قۇجات تاپسىرار كەزدە ءبىر-اق بىلگەن.
«مەديتسينالىق تەكسەرۋدەن ءوتىپ جاتقانىمدا دارىگەرلەر مەنەن كۇدىكتەنىپ، توموگرافياعا ءتۇسىردى. سول كەزدە بارىپ ميىمدا ىسىك بارى انىقتالدى. وبالى نە كەرەك، ول جەردەگى دارىگەرلەر دەرەۋ تىركەۋگە الىپ، مەنى استاناداعى نەيروحيرۋرگيالىق ورتالىققا جىبەردى. ءبىراق ماعان وتا جاساۋعا بولمايدى ەكەن. ىسىك ميدىڭ ەڭ بەلسەندى، قاجەتتى بولىگىندە بولىپ شىقتى، سوندىقتان الىپ تاستاسا مۇگەدەك بولىپ قالۋ قاۋپى بار دەدى دارىگەرلەر. ءبىر قۋانتارلىعى، ول ىسىك وسپەيدى ەكەن. دەگەنمەن ول مەنىڭ دامۋىما، فيزيكالىق تۇرعىدان جەتىلۋىمە، گورمونداردىڭ دۇرىس قالىپتاسۋىنا كەرى اسەرىن تيگىزگەن. سونىڭ سالدارىنان بويىم بۇگىندە 12-13 جاستاعى بالالاردىكىمەن بىردەي بولىپ قالعان. بويىم - 1 مەتر، 32 سانتيمەتر، ال سالماعىم - 28,5 كەلى»، - دەيدى ازامات.
قوجامقۇل بۇگىندە جەڭگەسىمەن بىرگە الماتى قالاسىندا ءجۇر ەكەن. تاياۋدا ول «قازاقستان» ۇلتتىق ارناسىنىڭ «ايتۋعا وڭاي» باعدارلاماسىنان بويى وسپەي قالعان ادامدارعا كومەك كورسەتە الامىن دەگەن دارىگەردىڭ ءسوزىن ەسىتىپ، سوعان كورىنۋگە بارىپتى. قۋانىشىنا وراي، قوجامقۇلدىڭ بويىنداعى كەمشىلىكتى تۇزەتۋگە مۇمكىندىك بار ەكەن. ءبىراق ول ءۇشىن 5 ميلليون تەڭگەدەي قاراجات كەرەك دەپتى دارىگەرلەر.
«الماتىدا جانگەنتحان ابىلاي ۇلى دەگەن دارىگەر بار ەكەن. ءوزى پروفەسسور. سول كىسىنىڭ قابىلداۋىندا بولدىم. مەنى باستان- اياق تەكسەردى، ءتۇرلى ساراپتامالار تاپسىردىم. قىسقاسى، بويىمنىڭ وزگە جىگىتتەر سەكىلدى ءوسىپ، جەتىلۋىنە مۇمكىندىك بار ەكەن. ءبىراق ول ءۇشىن ماعان ءبىر جىل بويى امپۋلاسى 120 مىڭ تەڭگە تۇراتىن «ۋكول» سالۋ قاجەت. جانگەنتحان ابىلاي ۇلى: «ونى ءوزىم تاۋىپ بەرەمىن، قالاي سالۋ كەرەگىن، بويىڭا، سالماعىڭا لايىقتى دوزانى دا بەلگىلەپ بەرەمىن. ءبىر اپتا باقىلاۋدا بولاسىڭ، سوسىن ءوز اۋىلىڭدا دا سالدىرا بەرۋگە بولادى»، - دەپ وتىر.
«نەگىزى مۇنداي ەمدى 28-29 جاسقا دەيىن قابىلداسا، شيپاسى داريدى ەكەن. ودان كەشىكسە، گورمونداردىڭ دامۋى توقتاپ، ادامنىڭ اعزاسى تۇبەگەيلى قالىپتاسىپ ۇلگەرەدى دە، «ۋكولدىڭ» كۇشى بولماي قالاتىن كورىنەدى. وسى نارسە مەنى قاتتى مازالاپ ءجۇر. ەرتەرەك ءتيىستى ەم- دومدى قابىلداپ، وزگە دوستارىم سەكىلدى سۇڭعاق بويلى بولسام دەيمىن»، - دەپ مۇڭىن شاقتى جىگىت.
قوجامقۇل - ۇيىندەگى 4 بالانىڭ كەنجەسى. وزىنەن ۇلكەن اعا- اپكەلەرى ۇيلەنىپ- جايلانىپ كەتكەن. اناسى زەينەتكەر ەكەن، ال اكەسى ەرتەرەكتە، بۇل 1- سىنىپقا بارار جىلى قايتىس بولىپتى. كەنەتتەن جۇرەگى توقتاپ قالعان اكەسىنىڭ جانسىز دەنەسىن كورگەن بالا قاتتى شوشىنىپ قالعان، اناسى ميداعى ىسىك سول كەزدەگى جاعدايدىڭ سالدارىنان بولۋى كەرەك دەپ بولجايتىن كورىنەدى.
قوجامقۇلدىڭ ولەڭ جازاتىن قابىلەتى بار. ونەرگە جاقىن. عالامتورداعى دەنە ءبىتىمى كەلىستى، بويى ۇزىن جىگىتتەردىڭ سۋرەتىن مونتاجداعاندى ۇناتادى. بولاشاقتا ءوزىن سونداي كەيىپتە كورگىسى كەلەدى.
«وزىممەن بىرگە وقىعان جىگىتتەردىڭ ءبارى ۇيلەنىپ جاتىر. مەن دە سولارعا قاراپ ۇيلەنسەم، بالا- شاعام كوپ بولسا دەپ ارماندايمىن. ءبىراق قازىرگى جاعدايىما، ءتۇر- الپەتىمە قاراپ قىزدارعا قىرىنداۋعا قورقامىن. كوبىسى مەنى كىشكەنتاي، مەكتەپ وقۋشىسى دەپ قالادى»، - دەيدى قوجامقۇل.
قوجامقۇلعا قول ۇشىن بەرەر قايىرىمدى جاندار تابىلسا، دارىگەرلەر ايتقان ءدارىنى ەرتەرەك سالدىرسا، نۇر ۇستىنە نۇر بولار ەدى. قوجامقۇلمەن ونىڭ جەڭگەسى كەنجە ارقىلى بايلانىسۋعا بولادى. تەلەفونى - 87078208430.
