دەليدە قازاقستان ارمياسىنىڭ 26 جىلدىعى اتالىپ ءوتتى
ءىس- شاراعا قازاقستان رەسپۋبليكاسىنىڭ ءۇندىستانداعى ەلشىسى بولات سارسەنبايەۆ، ءۇندىستان قورعانىس مينيسترلىگىنىڭ حالىقارالىق ىنتىماقتاستىق دەپارتامەنتىنىڭ باستىعى شامبۋ كۋماران، نيۋ- دەليدەگى ديپلوماتيالىق وكىلدىكتەر، شەت مەملەكەتتەردىڭ اسكەري اتتاشەلەرى، قورعانىس ونەركاسىبى كاسىپورىندارىنىڭ وكىلدەرى، ءۇندىستاننىڭ الەۋمەتتىك- ساياسي جانە ىسكەر توپتارىنىڭ باسشىلارى قاتىستى.
قازاقستان مەن ءۇندىستان مەملەكەتتەرىنىڭ ءان ۇراندارى ورىندالعاننان كەيىن جينالعاندارعا ارناپ بولات سارسەنبايەۆ ءسوز سويلەدى. ول ءوز سوزىندە اسكەري- تەحنيكالىق ىنتىماقتاستىق - قازاقستان مەن ءۇندىستان رەسپۋبليكاسى اراسىنداعى ستراتەگيالىق ارىپتەستىكتىڭ باسىم باعىتتارىنىڭ ءبىرى ەكەنىن اتاپ ءوتتى.
ال ءۇندىستانداعى قازاقستان رەسپۋبليكاسى قورعانىس مينيسترلىگىنىڭ اسكەري اتتاشەسى ماحامبەت بيسەنوۆ ەكى ەلدىڭ قارۋلى كۇشتەرىنىڭ ىنتىماقتاستىعىن تەرەڭدەتۋگە قازاقستاندىق تاراپتىڭ دايىن ەكەندىگىن ءبىلدىردى.
قوناقتار شارا بارىسىندا قازاقستان، ونىڭ اسكەرى مەن اسكەري- ونەركاسىپتىك كەشەنى تۋرالى فوتوسۋرەتتەر مەن بەينەلەردى تاماشالادى.
ەسكە سالا كەتسەك، 1992 -جىلدىڭ 7- مامىرىندا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ جارلىعىمەن ق ر قارۋلى كۇشتەرى قۇرىلعان بولاتىن.
