ەۋرازيا جۇرەگىندە: استاناعا 25 جىل
استانا. قازاقپارات - 1998 -جىلى 6-مامىردا اتاۋى رەسمي تۇردە استانا بولىپ وزگەرگەن ەلوردامىزعا 25 جىل تولدى. ال، 2009 -جىلدان بەرى استانا كۇنى ەلىمىزدە 6-شىلدەدە اتالىپ كەلەدى، دەپ حابارلايدى قازاقپارات ءتىلشىسى.
اۋەلى استانا كۇنى 10-اۋسىمدا تويلاناتىن. ويتكەنى، 1998 -جىلى ءدال وسى كۇنى جاڭا استانانى رەسمي تانىستىرۋ شاراسى وتكەن بولاتىن. 2008 -جىلى «مەرەكەلەر تۋرالى» زاڭعا تۇزەتۋلەر ەنگىزىلدى دە، رەسمي مەرەكە رەتىندە اتالىپ وتەتىن داتا قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ تۋعان كۇنىنە اۋىستىرىلدى.
جالپى، استانانى الماتىدان اقمولاعا اۋىستىرۋ تۋرالى ۇسىنىس ەلدىڭ زاڭ شىعارۋشى ورگانى ەكى پالاتاعا بولىنبەي تۇرعان كەزدە ايتىلعان. 1994 -جىلى جوعارعى كەڭەستە پرەزيدەنت نۇرسۇلتان نازاربايەۆ وسىنداي باستاما كوتەرەدى. وسىدان كەيىن باسپا ءسوز بەتىندە «استانانىڭ اقمولاعا كوشۋى قانشالىقتى ورىندى؟» دەگەن ماسەلە قىزۋ تالقىلاندى. يدەيانى سىناۋشىلار دا، قولداۋشىلار دا بارشىلىق ەدى. مىسالى، سول كەزدەگى بيلىككە وپپوزيتسيالىق باعىتتاعى جۋرناليست سانالاتىن ايگىلى قالامگەر مارات قابانباي استانانى كوشىرۋدى جاقتاپ، تالاي ماقالا جازدى.
بۇل توڭىرەكتەگى پىكىرتالاس 1997 -جىلى اقمولانى استانا ەتۋ تۋرالى پرەزيدەنت جارلىعى شىققاننان كەيىن دە تولاستامادى.
2019 -جىلى 20-ناۋرىزدا پرەزيدەنت وكىلەتتىگىن قابىلداپ العان قاسىم- جومارت توقايەۆ پارلامەنت پالاتالارىنىڭ بىرلەسكەن وتىرىسىندا استانا قالاسىنىڭ اتاۋىن نۇر- سۇلتان دەپ وزگەرتۋ جونىندە ۇسىنىس كوتەرىپ، دەپۋتاتتار تاراپىنان قولداۋ تاپتى.
قالا نۇر-سۇلتان اتاۋىن 2022 -جىلدىڭ 17-قىركۇيەگىنە دەيىن يەمدەندى. ويتكەنى، وسى كۇنى پرەزيدەنت قاسىم- جومارت توقايەۆ «قازاقستان رەسپۋبليكاسىنىڭ ەلورداسى - نۇر-سۇلتان قالاسىنىڭ اتاۋىن قازاقستان رەسپۋبليكاسىنىڭ ەلورداسى - استانا قالاسى دەپ وزگەرتۋ تۋرالى» جارلىققا قول قويدى.
اتالعان جارلىق قابىلداناردىڭ الدىندا پارلامەنتتىڭ بىرلەسكەن وتىرىسىندا «قازاقستان رەسپۋبليكاسىنىڭ كونستيتۋتسياسىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ماقۇلدادى.
ەلورداعا «استانا» اتاۋىن قايتارۋ تۋرالى باستاما رەسمي دەڭگەيدە 2022 -جىلدىڭ قىركۇيەگىندە ايتىلدى. ءماجىلىس دەپۋتاتتارىنان قۇرالعان «جاڭا قازاقستان» توبى ب ا ق وكىلدەرىمەن باسپا ءسوز ءماسليحاتىن وتكىزىپ، قوعام تالقىلاۋىنا وسىنداي ۇسىنىس تاستاعان.
