كەڭسەدە قابىلداپ، كەلىسىمشارت جاساسقان: ەلوردالىق بويجەتكەن 25 ادامدى الدادى
بۇل تۋرالى نۇر-سۇلتان قالالىق پوليتسيا دەپارتامەنتىنەن ءمالىم ەتتى، دەپ حابارلايدى قازاقپارات ءتىلشىسى.
ۆەدومستۆو اقپاراتىنا سايكەس، 27 جاستاعى قىز ەلوردا تۇرعىندارىنا مەملەكەتتىك ورگانداردا تانىستارى بار ەكەندىگىن ايتىپ، بەلگىلى ءبىر سوماعا مەملەكەتتىك باعدارلامامەن پاتەرلى بولۋعا جاردەمدەسۋگە ۋادە بەرگەن. كۇدىكتى الاياقتىق ارەكەتىن جۇزەگە اسىرۋ جانە ادامداردىڭ كۇدىگىن سەيىلتۋ ماقساتىندا فيرما تىركەپ، ارنايى كەڭسە جالعا العان. ول 2020 -جىلدىڭ ناۋرىزى مەن تامىزى ارالىعىندا زارداپ شەگۋشىلەرمەن مەملەكەتتىك باعدارلاماعا قاتىسۋ تۋرالى جالعان كەلىسىمشارتتار جاساسقان. ونىڭ الاياقتىق ارەكەتىنەن 25 ادام زارداپ شەككەن.
«زاردار شەگۋشىلەر ەنگىزگەن العاشقى جارنا سوماسى پاتەردىڭ اۋدانىنا بايلانىستى بولعان. ول ءوزىنىڭ سىياقىسىن بىردەن العان جانە ۋادەسىن ورىنداۋعا ارەكەتتەنبەگەن. وسىلايشا ول الدانىپ قالعان ازاماتتاردىڭ 56 ميلليون تەڭگەسىن قالتاسىنا باسقان. كۇدىكتى جاساعان الاياقتىق ارەكەتىن مويىندادى. ونىڭ ۇستىنەن ق رق ك 190-بابى 3-بولىگى بويىنشا تەرگەۋ جۇرگىزىلىپ جاتىر. سونىمەن قاتار ونىڭ ەلوردا اۋماعىندا جاسالعان ءدال وسىنداي قىلمىستارعا قاتىسى تەكسەرىلۋ ۇستىندە»، - دەدى دەپارتامەنتتەن.
اۆتور: مارلان جيەمباي