الماتى وبلىسىندا دەنەگە سۋرەت سالاتىن جىگىت 25 جاستاعى قىزدى ءولتىردى دەگەن كۇدىكپەن ۇستالدى

وقيعا قاراساي اۋدانىندا بولعان، دەپ حابارلايدى قازاقپارات ءتىلشىسى.

پوليتسەيلەر ەكى جەرگىلىكتى تۇرعىندى ۇستادى. ولاردىڭ بىرەۋى كىسى ولتىرۋگە، ەكىنشىسى ونى جاسىرعانى ياعني قىلمىس جونىندە حابارلاماعانى ءۇشىن تەرگەلۋدە.

الماتى وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، 24- قىركۇيەك كۇنى قاراساي اۋداندىق پوليتسيا باسقارماسىنا قاسكەلەڭ قالاسىنىڭ تۇرعىنى 25 جاستاعى اپكەسىنىڭ جوعالعانى تۋرالى ارىزدانعان. ءىز-ءتۇزسىز جوعالعان ايەلدى ىزدەۋ ءۇشىن اۋداندىق جانە وبلىستىق پوليتسيا قىزمەتكەرلەرى جۇمىلدىرىلعان. سونىمەن قاتار، ونىڭ جوعالۋىنا بايلانىستى قاراساي اۋداندىق پوليتسياسى ق ر ق ك 99- بابى بويىنشا قىلمىستىق ءىس قوزعادى.

«ىزدەۋ سالىنعان كولىك كوپ ۇزاماي ايتەي اۋىلىنىڭ ماڭىندا جانىپ كەتكەن كۇيىندە تابىلدى. جەدەل-ىزدەستىرۋ ءىس-شارالارى بارىسىندا كۇدىكتى ءوزىنىڭ سىبايلاسىمەن بىرگە ۇستالدى. ۇستالعان ادامدار تاۋلى ايماقتان جابىرلەنۋشىنىڭ ءمايىتى جەرلەنگەن ورىندى كورسەتتى»، - دەپ مالىمدەدى الماتى وبلىستىق پ د باسپا ءسوز قىزمەتى.

كىسى ولتىرگەن كۇدىكتى 22 جاستاعى جاس جىگىت دەنەگە سۋرەت سالاتىن سالونداردىڭ بىرىندە ىستەيتىنى بەلگىلى بولدى. قىلمىس كۇدىكتىنىڭ جۇمىس ورنىندا جاسالعانى انىقتالدى. ال وقيعانىڭ قالاي بولعانىن پوليتسيا سوتقا دەيىنگى تەرگەۋ بارىسىندا انىقتايدى.

«كۇدىكتىگە دوس بولىپ كەلەتىن ەكىنشى ۇستالعان ادامنىڭ ۇستىنەن ق ر ق ك 434-بابى بويىنشا ايىپ تاعىلادى. قازىر وسى فاكتى بويىنشا قاجەتتى ساراپتامالار تاعايىندالدى. ەكى كۇدىكتى دە كۇزەتپەن باقىلاۋدا»، - دەپ اتاپ ءوتتى وبلىستىق پوليتسيا دەپارتامەنتىنىڭ باسپا ءسوز قىزمەتى.