گولوۆكيننىڭ ەڭ ۇزدىك 25 نوكاۋتى - كەسكىن
گولوۆكين وسى ايقاستا ءوزىنىڭ مىقتىلىعىن كورسەتە الا ما؟ جەڭىس كىمنىڭ قانجىعاسىندا كەتەدى؟ بۇل ساۋال بوكس كورىگىن قىزدىراتىن اتاقتى ەكى بوكسشىنىڭ عانا ەمەس، ساراپشىلار مەن جانكۇيەرلەردى دە تولعاندىرىپ وتىر. ارينە، ەشكىم دە جەڭىلگىسى كەلمەيدى. الايدا الۆارەستىڭ باپكەرلەرى گولوۆكيننىڭ ساعىن سىندىرۋ ءۇشىن نەشە ءتۇرلى ايلى- شارعىعا بارۋدا. ءتىپتى بىلاپىت سوزدەر ايتىپ، گەناعا پسيحولوگيالىق قىسىم جاساۋعا تىرىسقان ساتتەرى دە بولدى. ءبىراق ودان ىعاتىن گولوۆكين ەمەس.
- مەن ونىڭ سازايىن بەرەمىن. بىلاپىت سوزدەرى ءۇشىن ونى ءوز ورنىنا قويامىن، - دەيدى گولوۆكين. ال الۆارەستىڭ باپكەرلەرى ءوز بوكسشىسىنىڭ جەڭەتىنىنە اسا سەنىمدى. «كانەللونىڭ» باپكەرلەر شتابى ەددي جانە حوسە «چەپو» «بۇل - بارلىق مەكسيكالىقتار ءۇشىن تاماشا كەش. «كانەلو» گولوۆكيننىڭ ءمىنسىز رەكوردىن تاس- تالقان ەتىپ، چەمپيوندىق بەلبەۋىن تارتىپ الادى. ونى جەڭۋ ءۇشىن بارلىق رەسۋرستارىمىزدى پايدالانامىز» ، - دەپ مالىمدەمە جاسادى.
جانكۇيەرلەر مەن بوكس ساراپشىلارىن قىزىقتىرىپ وتىرعان تاعى ءبىر جايت بار. الداعى جەكپە- جەك بارىسىندا گولوۆكين بارلىق چەمپيوندىق بەلبەۋىن تىگەدى. وسى كەزدەسۋدە جەڭىمپاز اتانعان بوكسشى The Ring چەمپيونى اتانىپ، WBC ۇيىمىنىڭ ارنايى بەلبەۋىن يەلەنەدى. سوندىقتان دا ايقاس وڭايعا سوقپايتىن ءتۇرى بار. امەريكالىق بەلگىلى رەفەري دجو كورتەس «بۇل كانەللو» ءۇشىن وتە اۋىر ايقاس بولادى. سوندىقتان ول بوكس داعدىسىن وزگەرتۋى كەرەك. ءبىر جىل بۇرىنعى جەكپە - جەكتە ول كوپ شەگىندى. ەندى شابۋىلعا شىعۋى قاجەت. بۇل - - وعان دوپينگتەن كەيىن بەرىلىپ وتىرعان ەكىنشى مۇمكىندىك. سوندىقتان 15- قىركۇيەكتە نە بولاتىنىن كورەمىز» ، - دەپ ءوز ويىن جاريا ەتتى.
راس قازىرگى كەزدە ەكى بوكسشى مەن ونىڭ باپكەرلەر شتابى ءبىر- بىرىنە اۋىر ءسوز ايتۋىن جالعاستىرۋدا. انشەيىندە كىسىگە قارسى قاتتى ءسوز ايتا قويمايتىن، ءبىراق سوققىلارى اۋىر گولوۆكيننىڭ مىنەزىنىڭ وزگەرە باستاۋى نەلىكتەن. ؟ بۇل ساۋالعا بۇكىلالەمدىك بوكس كەڭەسىنىڭ (WBC) باسشىسى ماۋريسيو سۋلەيمان جاۋاپ بەرگەندەي بولدى.
- جانجال دوپينگ داۋىنان باستالدى، ءبىراق گەنناديدىڭ بۇل تۋرالى مالىمەتى از بولدى. وتە اشۋلى بولۋى دا سودان. سودان بەرى اۋىر سوزدەر ايتىلا باستادى، - دەيدى ماۋريسيو سۋلەيمان. ازىرگە ەكى جاققا قاتىستى دا ءارتۇرلى بولجامدار ايتىلۋدا. بىرەۋلەرى «گولوۆكين جەڭىمپاز اتانادى» دەسە، ەكىنشىلەرى الۆارەسكە قازىردىڭ وزىندە جەڭىستى بەرىپ قويعان. اتاقتى بوكسشى ەۆاندەر حوليفيلد الەمنىڭ نازارىن اۋدارىپ وتىرعان بۇل ايقاستا گولوۆكيننىڭ باسىم بولاتىنىنا كۇمان كەلتىرمەيدى.
- گەننادي ەكى قولىمەن دە اۋىر سوققى جاساي الادى. ول ءسوزسىز جەڭەدى، ويتكەنى ۇنەمى شابۋىلداعانىمەن، قورعانىسى دا مىقتى - دەيدى ەۆاندەر حوليفيلد.
15 - قىركۇيەك اتاقتى ەكى بوكسشىنىڭ قايسىسىنىڭ مىقتى ەكەندىگىن انىقتايتىن كۇن. ال ءبىز شەشۋشى ايقاستا قازاقستاندىق بوكسشى گولوۆكينگە تەك قانا جەڭىس تىلەيمىز. سونىمەن قاتار، گەنانىڭ نوكاۋتپەن جەڭىسكە جەتكەن ەڭ ۇزدىك 25 ايقاسىن كورەرمەن نازارىنا ۇسىنۋدى ءجون كوردىك.
ەركىن قالدان
www.aikyn.kz
