ورالدىق جىگىت 25-قاباتقا ورمەلەپ شىقتى
استانا. قازاقپارات - ۆيدەودان الىنعان كادر اقتوبەدە 27 جاستاعى جىگىت ساقتانۋ قۇرالدارىنسىز قالاداعى ەڭ بيىك عيماراتقا ورمەلەدى.
25-قاباتتى ۇيگە بالكوندار ارقىلى ورمەلەپ شىققان جىگىت ورال قالاسىنىڭ تۇرعىنى ەكەن.
ءۇش كۇن بۇرىن «اقتوبەلىك ورمەكشى ادام» اتتى ۆيدەو جەلىدە تاراپ، قولدانۋشىلار اراسىندا تالقىعا ءتۇستى.
بىرەۋلەر جىگىتتىڭ ءىسى قاۋىپتى ءارى ءمانى جوق دەسە، ەندى ءبىر توپ ادام - وسى ارقىلى وسكەلەڭ ۇرپاققا ناشار ۇلگى كورسەتىلدى دەگەن. ال عيماراتقا ورمەلەگەن ازامات سۇيىنىشەۆتىڭ ءوزى ۆيدەونى بىلتىر تۇسىرىلگەنىمەن جاقىندا عانا جاريالانعانىن ايتادى.
«تۇسىرەمىز، ءبىراق، بىردەن جاريالامايمىز، تەك جارتى جىلدان كەيىن شۋ بولماۋى ءۇشىن. تاڭعى ساعات 4-تە ءتۇسىرىلدى، ءبارى ۇيىقتاپ جاتقاندا. مەندە مۇلدەم ەشتەڭە بولعان جوق، ارنايى زاتتار نەمەسە ساقتانۋ قۇرالدارى بولمادى. بۇل عيماراتتى 2015 -جىلى كوردىم دە، سودان بەرى 2 جىل دايىندالدىم، ءبارىن ەسەپتەپ. ونىنشى قاباتقا دەيىن 2,5 - 3 مينۋتتا ورمەلەپ شىقتىم دا، دەمالدىم. قولىم تالىپ قالدى. ارى قاراي ءاربىر 2-3 قابات سايىن تىنىعىپ وتىردىم. 25 قاباتقا دەيىن ناقتى قانشا ۋاقىت كەتكەنىن ايتا المايمىن. ۆيدەودا ورمەلەي باستاعاندا قاراڭعىلاۋ بولعانى كورىنىپ تۇر. ال سوڭعى قاباتتاردا تاڭ اتا باستادى»، - دەيدى ول.
ازامات - ۆاحتالىق تارتىپپەن جۇمىس ىستەيتىن قاراپايىم تۇرعىن. ونىڭ ايتۋىنشا، ەكستريم ءوزى ءۇشىن اۋاداي قاجەت، ءبىراق، ول ەشكىمدى ءوز ءىسىن قايتالاۋعا شاقىرمايدى.
«جاعىمسىز سوزدەرگە نازار اۋدارماۋعا تىرىسامىن. YouTube-تەگى روليكتىڭ تولىق نۇسقاسىندا مۇنى قايتالاۋ قاۋىپتى ەكەنى كورسەتىلگەن. مۇنداي شەتەلدە جانە رەسەيدە بار. بىزدە ادامدار تۇسىنە بەرمەيدى. مەن ەشكىمدى ۇگىتتەمەيمىن. مەن ءۇشىن بۇل اۋاداي قاجەت. ارينە قورقىنىش بولادى. مەن پاركۋر مەن كاسكادەرلىك ادىستەردى بايلانىستىرامىن، مۇنىمەن كوپتەن شۇعىلدانىپ كەلەمىن. بالا كەزىمدە دجەكي چاننىڭ كينولارىن كوپ كورگەنمىن، وعان قاتتى ۇقساعىم كەلەتىن. ەشكىم ۇيرەتكەن جوق، جاتتىقتىرعان ەمەس»، - دەيدى ازامات.
جىگىتتى رەسەيدىڭ كاسكادەرلىك مەكتەبىنە شاقىرعان. دەگەنمەن ول وتانسۇيگىشتىگىنەن ودان باس تارتىپتى. «ماقساتىم بار، قازاقستاندا جوق سپورتزال سالعىم كەلەدى. كۇرەس، جاتتىعۋ زالى، كاسكادەرلىك، گيمناستيكالىق جانە باسقا دا زالدار بولادى. جاستارىمىز سپورتپەن شۇعىلدانعانىن قالايمىن»، - دەپ ارمانىن ءبولىستى ول.
Tengrinews.kz
