ءابۋ- دابيدە ءوتىپ جاتقان ماماندىقتار دوداسىنا قازاقستاننان 25 ادام باردى

استانا. قازاقپارات -  الەمدەگى ەڭ ۇزدىك قۇرىلىسشى، ەلگەزەك داياشى، ەپتى تىگىنشى جانە شەبەر شاشتارازدار ءابۋ- دابيدە باس قوسىپ، ءوزارا مىقتىنى انىقتاپ جاتىر.

جۇمىسشى ماماندىقتار اراسىنداعى دۇنيەجۇزىلىك دوداعا بيىل 1 مىڭ 300 دەن استام قاتىسۋشى كەلدى. ولاردىڭ اراسىندا ءبىزدىڭ جەرلەستەرىمىز دە بار. ونداعان ماماندىق ءتۇرى، جۇزدەگەن قاتىسۋشى جانە مىڭداعان شارشى مەترلىك جارىس الاڭى.

ءابۋ- دابي بيىلعى الەم چەمپيونتىنا ەرەكشە دايىندالعان. ويتكەنى قازىرگى تاڭدا بىلىكتى جۇمىسشى ماماندارعا سۇرانىس وتە جوعارى. ال ولاردىڭ اراسىنداعى ناعىز شەبەرلەردى انىقتاۋ ءۇشىن بۇل تاپتىرماس مۇمكىندىك. قازاقستان اتىنان وسى دوداعا 25 ادام قاتىسىپ جاتىر.

داناگۇل بايع ۇلىنوۆا، قازاقستان قۇراماسىنىڭ تەحنيكالىق جەتەكشىسى:

-  ءبىز بۇل جەرگە وسىدان ءبىر اپتا بۇرىن كەلىپ، دايىندىق جۇمىستارىن باستادىق. جەرلەستەرىمىزدىڭ فيزيكالىق تا، پسيحولوگيالىق تا دايىندىعى جاقسى. سوندىقتان بەرىلگەن تاپسىرمانى بۇلجىتپاي ورىندايدى دەگەن ۇمىتتەمىز.

 قازاقستان قۇراماسى بيىلعى دوداعا راسىمەن دە جاقسى دايىندالعان. الدىمەن ىشكى رەسپۋبليكالىق چەمپيونات ۇيىمداستىرىلىپ، ۇزدىكتەر ىرىكتەلدى. كەيىن ولار ارنايى ماماندار جەتەكشىلىگىمەن بىرنەشە اي جاتتىعۋ جاسادى. ال ەندى سونىڭ جەمىسىن كورەر ۋاقىت كەلدى.

ەركەبۇلان سۇلتانعاليەۆ، قازاقستان قۇراماسىنىڭ مۇشەسى:

 -  مەن ءۇشىن ەڭ باستىسى -  تاجىريبە جيناقتاۋ. ال ەكىنشى كەزەكتە ۇزدىك ورىندى ەنشىلەۋ ماقساتى تۇر. باستىسى قازاقستانعا وزىق تاجىريبەلەردى اكەلىپ، ستۋدەنتتەردى ۇيرەتىپ، قازاقستاندا ينجەنەر گرافيكا باعىتىندا شەبەرلەردى دايىنداۋ كەرەك.

 الەم چەمپيوناتى دەپ اتىنىڭ ءوزى ايتىپ تۇرعانداي، بۇل دودا سپورتتىق ارەناداعى جاھاندىق جارىستاردان كەم تۇسپەيدى. 51 ماماندىق بويىنشا قىزۋ جارىس باستالدى. ستۋدەنتتەر بەلگىلى ءبىر ۋاقىت ارالىعىندا بەرىلگەن تاپسىرمانى ورىنداپ، 77 ەلدەن كەلگەن تورەشىلەردىڭ كوڭىلىنەن شىعۋى كەرەك.

بۇل چەمپيوناتتىڭ تاعى ءبىر ەرەكشەلىگى، باعدارلاماسىنداعى ماماندىقتار زامان تالابىنا ساي وزگەرىپ تۇرادى. ياعني قولدانىستان كەتىپ بارا جاتقان قىزمەت تۇرلەرى اۆتوماتتى تۇردە الىنىپ تاستالادى دا، ونىڭ ورنىنا جاپپاي قولدانىلىپ جاتقان جاڭا تۇرلەرى كەلەدى. ونىڭ ىشىندە ۆيزۋالدى مەرچەندايزينگ نەمەسە روبوت قۇراستىرۋ سياقتى تىڭ جوبالار بار جانە ەڭ باستىسى اتالعان ماماندىقتار بويىنشا ءبىزدىڭ جەرلەستەرىمىز دە قاتىسىپ جاتىر. جاي قاتىسىپ جاتقان جوق، فاۆوريتتەر تىزىمىندە. جارىس قورىتىندىسى 19 - قازاندا بەلگىلى بولادى.

www.24.kz