قىدىرالى بولمانوۆ: 25 جىلدا مەنەن باسقا ەشكىم وقۋ-ادىستەمەلىك قۇرال تۇگىلى ويىنشىق تا جاساماعان

ال كەشەلى بەرى ب ا ق بەتتەرىندە قىدىرالى بولمانوۆتىڭ بۇل اتاقتى الماعانى، رەسەيلىك عالىمداردىڭ مۇنداي اقپاراتتى جوققا شىعارعانى تۋرالى شۋ شىعىپ، قىزۋ تالقىعا تۇسكەن ەدى. وزىنە قاتىستى شىققان شۋمەن، جابىلعان جالانى كورگەن پروديۋسەر الەۋمەتتىك جەلىگە ءوز جاۋابىن جازىپ، دالەل رەتىندە ۆيدەو جۇكتەگەن.
اتپال ازاماتتىڭ جازباسىن الىپ قوسپاسىز ۇسىنىپ وتىرمىز:
«اسسالاۋماعالەيكۇم قازاق ەلى! مىناۋ جاسالىپ جاتقان وقۋ- ادىستەمەلىك كەشەن جونىندەگى باياندامادان ءۇزىندى. ۇستەلدىڭ جاپقىشىندا «اكادەميا ەستەستۆوزنانيا» دەپ جازىلىپ تۇر. ياعني رەسەي جاراتىلىس تانۋ اكادەمياسى. جانە حالىقارالىق پسيحولوگيا اكادەمياسى، پرەزيدەنتى رەسەي اكادەميگى ۆ. ۆ. كوزلوۆ. وسى ەكى اكادەميا ماعان دوكتور PhD، پسيحولوگيا عىلىمدارىنىڭ كانديداتى اتاعىن بەردى.
بىرنەشە جىل جازىپ، 2015 -جىلى عىلىمي ديسسەرتاتسيا قورعادىم. قورعاۋ الدىندا بىرنەشە مەملەكەتتە باسپا ءسوز بەتىندە ماقالالارىم شىقتى. ديسسەرتاتسيا تاقىرىبى "فورميروۆانيا ەلەمەنتوۆ ەتنيچەسكوگو ساموسوزنانيا ليچنوستي دوشكولنيكا" (مەكتەپ جاسىنا دەيىنگى بالانىڭ ۇلتتىق ساناسىن قالىپتاستىرۋ). «گاككۋ» ارناسى ديسەرتاتسيا قورعاۋىندا بولعان.
قازىرگى داۋ كوتەرىپ وتىرعان ادامدار رەسەي عىلىم اكادەمياسىنان (ر ع ا) مەنىڭ فاميليامدى سۇراستىرعان. ءبىراق ولار رەسەي جاراتىلىس تانۋ اكادەمياسىنان (ر ج ا) ەمەس، باسقا اكادەميادان سۇراعان. رجا- دان سۇراسا مەنىڭ فاميليام تىركەلگەن. نەگە ولار تىركەلگەن، ديسسەرتاتسيا قورعالعان جەردەن سۇرامايدى؟ اتالمىش اكادەميالاردىڭ بارلىعى رەسەيلىك.
ال مەن عىلىم جولىندا جۇرگەن ادام ەمەسپىن. مەملەكەتتىك قىزمەتتە جوقپىن. ەشكىمنىڭ باسىن جارىپ، كوزىن شىعارماپپىن. مەنىڭ جۇمىستارىمنان ەشكىم زيان شەكپەپتى.
اللاعا سانسىز ماداق! باستى نيەتىمىز ادىستەمەلەر «قيسىق» بولىپ كەتپەۋ ءۇشىن، عىلىم نەگىزىندە جاساپ شىعارۋدى ۇيعارىپ، عىلىمنىڭ تەرەزەسىن قاقتىق. ۇلكەن عالىمدارمەن اقىلداسا وتىرىپ، كەرەگىن الدىق. ەڭ باستىسى ديسسەرتاتسيا ەمەس، ەڭ باستىسى ءونىم بار: «بالبالا» وقۋ- ادىستەمەلىك كەشەنى. ءبىلىم مينيسترلىگىنىڭ اتتەستاتسيالارىنان وتكەن. (ق ر ءبىلىم جانە عىلىمي مينيسترلىگىنىڭ 10.12.2014 -جىلعى №515-بۇيرىعىمەن ءبىلىم بەرۋ ۇيىمدارىندا رۇقسات ەتىلگەن وقۋلىقتار مەن وقۋ- ادىستەمەلىك كەشەندەر تىزىمىنە ەندىك).
قازاقستان بويىنشا زەرتحانالىق تەكسەرۋدەن وتەتىن ويىشىقتار تەك قانا «بالبالا». تازالىققا قاتىستى سەرتيفيكاتتاردىڭ ءبارى بار. ەگەر مەنىڭ عانا ديسسەرتاتسيام وتە ماڭىزدى "قاۋىپ" ءتوندىرىپ تۇرعان بولسا قايتالاپ، دامىتىپ قازاقستاندا دا ديسسەرتاتسيا قورعاۋعا دايىنمىن. تاقىرىپتى ەشكىمنەن ۇرلاپ المادىم. تاقىرىبىم تىڭ. 25 جىل ىشىندە بۇرىن سوڭدى مەنەن باسقا ەشكىم وقۋ- ادىستەمەلىك قۇرال تۇگىلى، قازاقشا ءان ايتاتىن، قازاقشا سويلەيتىن ويىنشىق تا جاساماعان. سوندا وسىنشا شۋ نە ءۇشىن؟ كىمگە قاجەت؟ ەلىمىزدىڭ دامۋىنا قانداي پايداسى بار؟ ءسىز قالاي ويلايسىز قازاعىم؟»