فرانسۋا وللاند قازاقستان پرەزيدەنتىنە جولداعان حاتىندا 25 جىل بۇرىن بولعان كەشكى استى ەسكە الدى

بۇگىن استانادا وتكەن باسپا ءسوز ءماسليحاتىندا ونى فرانسيانىڭ قازاقستانداعى ەلشىسى فرانسيس ەتەن وقىپ بەردى، دەپ حابارلايدى قازاقپارات ءتىلشىسى.
«فرانسيا مەن قازاقستاننىڭ اراسىنداعى ديپلوماتيالىق قارىم- قاتىناستاردىڭ 25 جىلدىعىنا وراي قۇتتىقتاپ جولداعان حاتىڭىزعا زور العىسىمدى بىلدىرەمىن. ءوز كەزەگىمدە فرانسيانىڭ قازاقستانمەن اراداعى بايلانىستاردى ۇدايى نىعايتۋعا وراسان ءمان بەرەتىنىن جەتكىزۋگە رۇقسات ەتىڭىز.
25 جىل بۇرىن، 1992 -جىلى 23 - قىركۇيەكتە ەليسەي سارايىندا ءسىز فرانسۋا ميتتەرانمەن كەزدەسكەن ەدىڭىز. ءسىزدىڭ مارتەبەڭىزگە وراي ۇيىمداستىرىلعان كەشكى اس ۇستىندە ءبىزدىڭ ارىپتەستىگىمىزدى بارلىق سالالار بويىنشا دامىتۋعا دەگەن فرانسيانىڭ قالاۋىن فرانسۋا ميتتەران اتاپ وتكەن بولاتىن.
بۇگىندە ءبىزدى وسى جولدا ىلگەرى باسىپ كەلە جاتقانىمىزدى ەرەكشە اتاپ وتۋگە بولادى. 2015 -جىلى 5 - قاراشادا پاريجدە كەزدەسكەن كەزدە مەن قازاقستان ەكونوميكاسىنىڭ بەرىكتىگىنە سەنىم ءبىلدىرىپ، ورتاق جوبالارىمىزدى ناقتىلاۋداعى كەدەرگىلەر جويىلسا ەكەن دەگەن تىلەگىمدى بىلدىرگەن ەدىم.
مەنىڭ سەنىمدىلىگىم وزگەرگەن جوق، كەز كەلگەن جاعدايدا فرانسيا فرانكو- قازاقستاندىق ارىپتەستىكتىڭ تۇراقتىلىعى مەن تيىمدىلىگى جولىندا جۇمىس جاسايتىن بولادى. سوعان سەنىمدى بولا الاسىز»، - دەپ جازدى وللاند ءوز حاتىندا.
فرانسيانىڭ قازاقستانداعى ەلشىسى فرانسيس ەتەننىڭ ايتۋىنشا، ەكى ەل اراسىنداعى ديپلوماتيالىق قارىم- قاتىناستاردىڭ 25 جىلدىعىنا وراي ءتۇرلى مەرەكەلىك شارالاردى وتكىزۋ جوسپارلانعان. وسى داتاعا ارنالعان لوگوتيپ ازىرلەنىپ، پوشتا ماركاسى شىعارىلاتىن بولادى.
اۆتور: ارمان اسقاروۆ