قازاقستاندا كوشپەلى تۋريزم نارىعى 25 پايىزعا تومەندەدى
بۇل جايىندا ورتالىق كوممۋنيكاتسيالار قىزمەتىندەگى بريفينگتە ق ر ينۆەستيتسيالار جانە دامۋ مينيسترلىگى تۋريزم يندۋسترياسى دەپارتامەنتى ديرەكتورىنىڭ ورىنباسارى تەمىرعالي تىرمىشيەۆ ءمالىم ەتتى، دەپ حابارلايدى قازاقپارات.
«2014-جىلى تۋريستىك فيرمالار ارقىلى شامامەن جارتى ميلليون تۋريست تىركەلگەن بولاتىن. سوڭعى 2 جىلدا تۇركيا باعىتىندا قۇلدىراۋ 50 پايىز مولشەرىندە بايقالىپ وتىر. كوشپەلى تۋريزم نارىعىنداعى قۇلدىراۋ تولىقتاي العاندا شامامەن 20-25 پايىزدى قۇرايدى»، - دەدى تىرمىشيەۆ.
سونىمەن قاتار تاياۋدا عانا ىسكە قوسىلعان شەتەلدە تۋريستەردىڭ قۇقىعىنا كەپىلدىك بەرۋ جۇيەسىنىڭ قالاي جۇمىس ىستەيتىندىگىن ءتۇسىندىرىپ بەردى. «كوشپەلى تۋريزم سالاسىندا ازاماتتارعا كەپىلدىك بەرۋ جۇيەسى تۋريستىك وپەراتوردىڭ كىناسىنەن شەتەلدە قيىن جاعدايعا تاپ بولعان ءبىزدىڭ ادامدارعا شۇعىل ەلگە جەتكىزۋگە باعىتتالعان.
سونىمەن قاتار تۋريستىك نارىق سۋبەكتىلەرىنىڭ جاۋاپكەرشىلىگىن ارتتىرۋدى دا كوزدەيدى. 2010-جىلدان باستاپ جىل سايىن جازدىق ماۋسىم كەزىندە تۋريستىك وپەراتوردىڭ بانكروت بولۋىنا نەمەسە قانداي دا ءبىر الاياقتىق سىزبا سالدارىنان ورىن الاتىن جايتتەر جيىلەپ كەتتى.
اعىمداعى جىلى «تۋريستىك قامقور» دەپ اتالاتىن ايرىقشا قور ەنگىزىلدى، ونىڭ قارجىسى ەسەبىنەن ءبىزدىڭ ازاماتتار شۇعىل ەلگە جەتكىزىلەتىن بولادى»، - دەدى دەپارتامەنت ديرەكتورىنىڭ ورىنباسارى.
ونىڭ دەرەكتەرىنە سايكەس، وسى ۋاقىتقا دەيىن 12 مىڭ ادام زارداپ شەگىپ، شىعىن سوماسى ونداعان ميلليونعا جەتكەن. «بۇل جۇيە حالىقارالىق تاجىريبە نەگىزىندە قۇرىلدى. ونىڭ نەگىزىنە ۇلىبريتانيا تاجىريبەسى الىندى، سونىمەن قاتار سكانديناۆيالىق، رەسەيلىك تاجىريبەلەر دە زەردەلەندى. الىمنىڭ قازىرگى قولدانىستاعى ستاۆكاسىمەن شامامەن 180 ميلليون جيناۋ جوسپارلانۋدا. ءبىز اتالعان سوما تۋريستەرىمىزدى ەلگە جەتكىزۋ ءۇشىن چارتەرلەر قۇرۋعا جەتكىلىكتى بولادى دەپ ەسەپتەيمىز»، - دەدى ول.
«تۋريستىك قامقور» قورىنىڭ ءتورايىمى يننا رەيدىڭ ايتۋىنشا، قور 7- قاراشادان باستاپ جۇمىس ىستەۋدە.
باستى تەتىگى - تۋر- كود. ول قىزمەت ۇسىنىپ وتىرعان تۋريستىك وپەراتوردىڭ قور تاراپىنان قورعالعاندىعىن بىلدىرەدى. «اعىمداعى جىلدىڭ 7- قاراشاسىنان باستاپ تۋريستىك كودسىز شىعۋ زاڭسىز دەپ ەسەپتەلىنەدى. 40 تان استام تۋريستىك وپەراتور قوردىڭ قاتىسۋشىسى سانالادى، شامامەن تاعى 25 ءى شارتقا قول قويۋ پروتسەسسىندە. جىلدىڭ سوڭىنا دەيىن بارلىعى دا زاڭدى تۋريستىك وپەراتور بولۋى قاجەت»، - دەدى رەي.
اۆتور: مارلان جيەمباي
